Prej ditësh, banorët e Rrjollit po përballen me policinë për të mbrojtur pronën e tyre e cila i është dorëzuar investitorëve, të cilët tani më kanë nisur punimet për ndërtimin e resortit. Pas nisjes së punimeve kanë nisur edhe përplasjet më të ashpra me policinë, ku kjo e fundit ka përdorur edhe dhunë fizike me disa nga banorët që kanë dalë në protestë. Banorët janë në pritje të një zgjidhje e cila me sa duket është e largët, por në këtë valë protestash dhe përplasjesh mes banorësh e policësh ajo që vihet re është mbështetja që po i jepet secilës palë. Këtë herë krah banorëve të Rrjollit është parë edhe deputeti i Partisë Socialiste, Ermal Pecaj.
Në një postim të shpërndarë krah një videoje që tregon dhunën e policisë ndaj protestuesve, Pacaj shkruan: “Absolutisht e tepruar, shumë. Dënoj dhe përçmoj goditjen me grushta dhe shkelma kundër banorit dhe banorëve të Rrjollit. Akt i papranueshëm, vandal dhe bandit. Këto probleme nuk zgjidhen me dhunë e brutalitet, zgjidhen me drejtësi dhe institucione legjitime, duke respektuar të drejtat e patjetërsueshme që na garanton Kushtetuta!”
Postimi i Pacajt tregon qartë një reagim kundër çdo forme dhune ndaj qytetarëve. Ai nënvizon se aktet e dhunës ndaj banorëve të Rrjollit janë absolutisht të papranueshme dhe jo vetëm të gabuara, por edhe një shkelje e qartë e ligjit dhe e të drejtave të njeriut. Sipas tij problemet sociale dhe konfliktet nuk mund të zgjidhen me brutalitet, por vetëm përmes drejtësisë, dialogut dhe respektimit të institucioneve dhe të drejtave kushtetuese të qytetarëve.
