Shtëpia e Bardhë ka publikuar një material ku sipas tyre shpjegohet e vërteta mbi origjinën e COVID-19. Materiali hedh poshtë teorinë e Faucit se COVID-19 kishte origjinë natyrore.
Sipas materialit të publikuar ata arsyetojnë se:
1. Virusi zotëron një karakteristikë biologjike që nuk gjendet në natyrë.
2. Të dhënat tregojnë se të gjitha rastet e COVID-19 rrjedhin nga një hyrje e vetme tek njerëzit. Kjo bie ndesh me pandemitë e mëparshme, ku kishte disa raste kalimi nga kafshët tek njerëzit.
3. Wuhan është shtëpia e laboratorit më të avancuar të kërkimeve për SARS në Kinë, i cili ka një histori të kryerjes së kërkimeve gain-of-function (ndryshim gjenetik dhe fuqizim i organizmave) në nivele të papërshtatshme të sigurisë biologjike.
4. Studiues në Institutin e Virologjisë në Wuhan (WIV) ishin të sëmurë me simptoma të ngjashme me COVID në vjeshtën e vitit 2019, muaj para se COVID-19 të zbulohej në tregun e kafshëve.
5. Sipas pothuajse çdo matjeje shkencore, nëse do të kishte prova për një origjinë natyrore, ato do të kishin dalë në dritë. Por nuk kanë dalë.
Çfarë shkruhet në materialin e publikuar
Publikimi i “Proximal Origin”
Publikimi “The Proximal Origin of SARS-CoV-2” i cili u përdor vazhdimisht për të diskredituar teorinë e rrjedhjes nga laboratori u nxit nga Dr. Fauci për të përhapur narrativën se COVID-19 kishte një origjinë natyrore.
Kërkimet “GAIN-OF-FUNCTION”
Një incident laboratorik që përfshin kërkime gain-of-function është origjina më e mundshme e COVID-19. Mekanizmat aktualë të qeverisë për mbikëqyrjen e këtyre kërkimeve të rrezikshme janë të paplota, të ndërlikuara dhe nuk kanë zbatim global.
Organizata me kërkimet shkencore “Eco Health”
EcoHealth nën drejtimin e Dr. Peter Daszak përdori paratë e taksapaguesve amerikanë për të ndihmuar kërkimet e rrezikshme gain-of-function në Wuhan, Kinë. Pas publikimit të provave nga Nënkomiteti Hetimor për shkeljen e kushteve të grantit të dhënë nga National Institutes of Health (NIH), Departamenti Amerikan i Shëndetit dhe Shërbimeve Njerëzore (HHS) nisi procedurat zyrtare të ndalimit të financimit dhe pezulloi çdo fond për EcoHealth.
Prova të reja gjithashtu tregojnë se Departamenti i Drejtësisë (DOJ) ka hapur një hetim për aktivitetet e EcoHealth gjatë pandemisë.
Dështimet e institutit për kërkime biomjekësore dhe shëndetësore “NIH”
Procedurat e NIH për financimin dhe mbikëqyrjen e kërkimeve potencialisht të rrezikshme janë të mangëta, të pasigurta dhe përbëjnë një kërcënim serioz për shëndetin publik dhe sigurinë kombëtare. Për më tepër, NIH krijoi një mjedis që inkurajonte shmangien e ligjeve federale për mbajtjen e të dhënave siç shihet nga veprimet e Dr. David Morens dhe “FOIA Lady” Marge Moore.
Pengesat e Ministrisë së Shëndetësisë e Shteteve të Bashkuara “HHS”
Administrata Biden, përmes HHS, u përfshi në një fushatë shumëvjeçare vonesash, konfuzioni dhe mungesë reagimi, në përpjekje për të penguar hetimin e Nënkomitetit Hetimor dhe për të fshehur prova që mund të implikonin apo turpëronin zyrtarët e lartë të shëndetit publik. Ka të dhëna që HHS qëllimisht nuk i dha burimet e nevojshme një komponenti të vet që merret me përgjigje ndaj mbikëqyrjes legjislative.
Pengesat e “ECOHEALTH”
Presidenti i EcoHealth, Dr. Peter Daszak, pengoi hetimin duke dhënë informacione të disponueshme publikisht, duke udhëzuar stafin të ngadalësojë dhe zvogëlojë përmbajtjen e materialeve, dhe duke falsifikuar dokumente para se t’i publikonte. Gjithashtu, Dr. Daszak dha deklarata të rreme para Kongresit.
Dr. David Morens, këshilltari i lartë i Dr. Fauci, Dr. David Morens, pengoi qëllimisht hetimin e Nënkomitetit Hetimor, ka gjasa që ka gënjyer Kongresin në disa raste, fshiu në mënyrë të paligjshme të dhëna federale mbi COVID-19 dhe ndau informacione jo publike mbi grantet e NIH me Dr. Peter Daszak.
Pengesat e NJU JORKUT
Kabineti Ekzekutiv i Nju Jorkut aktualisht i drejtuar nga Guvernatorja Kathy Hochul redaktoi dokumente, paraqiti pretendime të shumta të rreme për privilegj dhe mbajti mijëra dokumente pa bazë të dukshme ligjore, për të penguar hetimin mbi dështimet gjatë pandemisë të ish-guvernatorit Andrew Cuomo.
Organizata Botërore e Shëndetsisë
Reagimi i OBSH-së ndaj pandemisë COVID-19 ishte një dështim i plotë sepse iu nënshtrua presionit të Partisë Komuniste Kineze dhe vuri interesat politike të Kinës përpara detyrimeve ndërkombëtare. Për më tepër, përpjekja më e fundit e OBSH për të adresuar problemet e theksuara nga pandemia përmes një “Traktati Pandemik” mund të dëmtojë Shtetet e Bashkuara.
Distancimi Shoqëror
Rekomandimi për të qëndruar “6 këmbë larg” i cili mbylli shkolla dhe biznese të vogla në të gjithë vendin ishte arbitrar dhe jo i bazuar në shkencë. Gjatë një dëshmie me dyer të mbyllura, Dr. Fauci dëshmoi se ky udhëzim “thjesht u shfaq.”
Detyrimet për maskat
Nuk kishte prova përfundimtare që maskat mbronin efektivisht amerikanët nga COVID-19. Zyrtarët e shëndetit publik ndryshuan vazhdimisht qëndrimin për efikasitetin e maskave pa ofruar të dhëna shkencore duke shkaktuar një rritje të madhe të mosbesimit publik.
Izolimet
Izolimet e zgjatura shkaktuan dëme të pallogaritshme jo vetëm në ekonominë amerikane, por edhe në shëndetin mendor dhe fizik të qytetarëve, veçanërisht tek të rinjtë. Në vend që të mbronin grupet më të rrezikuara, politikat federale dhe shtetërore detyruan miliona amerikanë të heqin dorë nga aspekte thelbësore të një jete të shëndetshme dhe të qëndrueshme financiarisht.
Dështimet e NJU JORKUT gjatë pandemisë
Urdhri i 25 marsit i ish-guvernatorit të Nju Jorkut Andrew Cuomo që detyroi shtëpitë e të moshuarve të pranonin pacientë pozitivë me COVID-19 ishte “një mjekësi e gabuar”. Provat tregojnë se Cuomo dhe administrata e tij u përpoqën të mbulonin pasojat tragjike të vendimeve të tyre politike për të shmangur përgjegjësinë.
Dezinformimi për COVID-19
Zyrtarët e shëndetit publik shpesh mashtruan popullin amerikan përmes mesazheve kontradiktore, reagimeve impulsive dhe mungesës së transparencës. Më së keqi, qeveria federale demonizoi trajtime alternative dhe narrativa të papëlqyera, si teoria e rrjedhjes nga laboratori, në një përpjekje të turpshme për të detyruar dhe kontrolluar vendimet shëndetësore të njerëzve.
Kur këto përpjekje dështuan, administrata Biden kaloi në “censurë të hapur duke bashkëpunuar dhe ushtruar presion mbi kompanitë më të mëdha të mediave sociale për të censuruar çdo mendim ndryshe në lidhje me COVID-19.
Lexo KËTU materialin e publikuar.
