Vatra e zjarrin vijon të jetë aktive në Himarë. Flaka ka shkrumbuar kodrën në lagjen “1 Maji”. Sipas njoftimit të ministrisë së Mbrojtjes janë djegur plotësisht 6 banesa, 3 prej te cilave të banuara. Forcat e Armatosura kanë bërë evakuimin e 36 personave. Intensiteti i zjarrit ka rënë, ndërsa po punohet për shkuarjen e tij. Helikopterët vijojnë aksionin nga ajri duke mbushur kova me ujë në det. Natën banorët e kanë kaluar jashtë pasi era favorizoi flakët që u afruan me shpejtësi pranë shtëpive. Shumë prej turistëve janë larguar me automjete pas thirrjes për evakuim. Mëngjesi paraqitet më i qetë. Disa prej pushuesve vijojnë të qëndrojnë në bregdet pavarësisht se nga kodra duken ende retë e tymit.
Prefektja e Qarkut Vlorë, Evis Alushi konfirmon se nuk ka patur rrezik për njerëzit pasi janë larguar në kohë. Sipas saj një prej zonave ku vijon përqendrimi i forcave është Kodra e Pilurit. Në Fotamë situata është e neutralizuar dhe nuk paraqet kërcënim për zonën e banuar. Zjarri ka dëmtuar edhe ullishtat qindravjeare, për të cilat Alushi thotë se do bëhet një vlerësim plotë.
Krahas Himarës, vatra aktive zjarri ka në Dajt vijon puna pre ditësh, në Qinam të Zall-Herrit është bërë e mundur të shmanget shtrirja deri afër zonave të banuara. Në Dibër vijojnë aktive vatrat në Vajkal, Lundre–Madhesh dhe Mallunxë-Lis, por a rrezik për zonat e banuara. Në Lezhë, zjarri vijon të djegë bimësinë në Gallata dhe Kalivaç-Zimaj-Kashnjet. Raportohet se zjarri masiv në zonën Drizë-Vadhizë-Peshtan-Levan, është nën kontroll.
Në operacione janë angazhuar 881 forca operacionale dhe 75 automjete zjarrfikëse, si dhe 340 forca ushtarake, 4 automjete zjarrfikëse të FA, helikopterët e Forcës Ajrore me 6 operacione dhe 1 avion Air Tractor. Për ditën e sotme parashikohet angazhimi i 380 forcave ushtarake, 2 helikopterëve dhe 1 Air Tractor.
