Kantautori Alban Skënderaj rikthehet me albumin e ri “Rrënjët”, i cili promovohet më 2 maj. Artisti është shprehur se është një projekt që prek identitetin dhe kujtesën, të ndërtuara mbi emocione të forta të bartura ndër vite e që tani kanë marrë formë përmes artit e muzikës.
Skënderaj njihet për individualitetin e motiveve shqiptare të cilat i ka ruajtur edhe pse është rritur larg Shqipërisë. “Unë jam larguar në një moshë shumë të re dhe nuk pata mundësinë të njihem thellësisht me muzikën tonë, por gjurmët e motiveve tona lanë shenja edhe tek unë… në fund të fundit, të gjithë kthehemi diku,” thotë Skënderaj duke shënuar kthimin te pragu i shtëpisë, aty ku jetuan të parët. E gjithë përvoja e tij jetësore është rrëfyer përmes muzikës në 8 këngë e 8 klipe që janë të lidhur me njëri-tjetrin përmes fillit të jetës së artistit.
Kopertina e albumit “Rrënjët” është një gjetje. Skënderaj qëndron përballë fëmijës së dikurshëm që e kthen te rrënjët e veta. Për Skënderajn ky album është më autentiku dhe se i është dashur të punojë për një kohë të gjatë, kohë që i ka vlejtur të transmetojë ndjesi të sinqerta dhe të papërpunuara. “Energjia dhe dashuria që kam marrë gjatë tour-it ‘MOTIV’ më kanë frymëzuar të jem sërish si dikur, totalisht vetvetja,” shprehet artisti. Dëgjimi i këngëve të albumit “Rrënjët” është një shtysë për t’u ndalur një çast e për të ritakuar veten, me ndjesi të harruara e për të rigjetur kuptimin e asaj që kalon e asaj që vjen.
Burimi:https://www.instagram.com/albanskenderaj/?hl=en
Foto:https://www.instagram.com/albanskenderaj/?hl=en
