Edi Rama mund të jetë kryeministri me më shumë “zanate” në historinë e kryeministrave shqiptarë.

Basketbollist, piktor, dizajner, publicist, kritizer, showman, këngëtar, aktor, gaztor por së fundi ai i është rikthyer pasionit të tij të hershëm; gazetarisë.

Pas shumë e shumë sinjalesh dhënë gazetarëve, drejtuesve të emisioneve apo analistëve lidhur me mënyrën se si duhet ta bëjnë gazetarinë, kryeministri i është futur punës duke nxjerrë me duart e tij produktin gazetaresk: një kronikë televizive me bazë zërin e tij, duke përdorur pamje të emisionit “Opinion” në TV Klan dhe ABC News-it por duke përdorur edhe idenë e gjysmë të vërtetave, që kritiku i tij i përhershëm Fatos Lubonja e ka artikuluar shpesh në publik duke shënjestruar pikërisht qeverisjen e Ramës.

Shënjeshtra e Ramës kësaj radhe ka qenë Armand Shkullaku dhe gjithë ata që Ramën e kanë akuzuar ose së paku e kanë pyetur për qeverisjen e vendimet e gabuara.

Sprova “Alo, Edi jam!” duket se i ka bërë punë kryeministrit shqiptar për të mprehur shqisat e për të hedhur zërin e tij në pajisjet e regjistrimit.

Me një ritëm të ngadaltë ndryshe nga ç’jemi mësuar ta dëgjojmë, Rama lexon rreshtat e një kronike 4 minuta e 17 sekonda. E nis me parashtrimin e qëndrimit të Shkullakut në emisionin “Opinion” duke përdorur me mjeshtëri edhe tonin, ndërsa pas shumë pak sekondash del në konkluzionin se Shkullaku ka dezinformuar për impiantin e Elbasanit.

Rama i shfrytëzon Shkullakut një prodhim të vetin si drejtor ekzekutiv në ABC News lidhur me impiantin e Elbasanit, në të cilën thuhej se kjo strukturë punonte, ndryshe nga sa pohoi analisti në studion e “Opinioni”-t.

Në pjesën e dytë të kronikës, Rama mendon të lërë pak mënjanë gazetarin e të rikthehet te zanati që ka bërë më shpesh gjatë 20 viteve në pushtet: strategjistit e propagandistit, duke përdorur me zotësi teknikën e manipulimit.

Sipas Ramës, gazetarët që i rreshton jo pa qëllim mes politikanëve si Berisha, Vokshi, Basha, Kryemadhi apo edhe presidenti Meta (edhe ky një manipulim, njësoj siç bën me gazetarët kur i quan të gjithë kazanë) nuk e paskan me Edi Ramën por e paskan me Shqipërinë që e duan “plaçkë” dhe me qytetarët që i dashkan “mish për top”.

Rama mendoka se qenka vetëm pengesa dhe jo shkaktari i të gjithë situatës, për të cilën gazetarët investigojnë e analistët interpretojnë.

SHKULLAKU LULËZIMI PLEHRAT OPINIONIParmbrëmë tek Fevziu, Armand Shkullaku ishte në krye të luftës së panelit të armatosur me gjysëm të vërteta (që janë edhe gënjeshtrat më të mëdha), për t'i bërë jehonë sulmit sharjeshpifës të Lulëzimit mbi impiantet moderne të përpunimit të mbetjeve në Tiranë, Elbasan e Fier ose siç i quan Lulëzimi, me atë fodullëkun përbuzës të gjumashit kur bën sikur s'ka gjumë, "inceneratorët". Analisti arriti të mohonte sy për sy edhe fjalët e veta edhe vetë provën materiale, e cila rrëzoi në sy të të gjithëve gënjeshtrën ulëritëse se në impiantin e Elbasanit nuk është prodhuar kurrë energji! Por e vërteta e plotë lidhur me këtë episod, ku analisti u vu këmbëngulësisht në shërbim të Lulëzimit, është se Shkullaku jo vetëm nuk gënjeu nga padija, po ai vetë, në cilësinë e drejtuesit të prodhimit të TV KLAN, ka bërë edhe një goxha film për inceneratorin dhe për prodhimin e energjisë nga plehrat në Elbasan disa vite më parë! Nuk e di nëse filmi në fjalë është bërë dhe shfaqur kundrejt pagesës apo ka qenë thjesht entuziazmi për impaktin e madh pozitiv mbi mjedisin të inceneratorit të Elbasanit, por materiali të cilin mund ta gjeni të plotë në youtube ➡️ youtu.be/_nk9-3Av39Y duket se i ka pëlqyer aq shumë drejtuesit të atëhershëm të prodhimeve sa që e ka shfaqur edhe në ABC News edhe në TV KLAN! Kush do të mësojë ca më shumë se ç'i panë sytë e ç'i dëgjuan veshët tek Fevziu gjatë atij debati haluçinant, le të ndjekë 4 minutat bashkëngjitur…

Geplaatst door Edi Rama op Zaterdag 17 oktober 2020

Është fakt i njohur që kryeministri Edi Rama e ka dashuri të vjetër dëshirën për të shkruar.

Sprovat e tij të para të njohura publikisht në gazetari kanë qenë në gazetën “Koha Jonë” kur vendin e qeveriste Sali Berisha, duke bërë rolin e një prej bashkëpunëtorëve të gazetës.

VideoEdi Rama në Lezhë në maj 2001 duke thënë se pa gazetën “Koha Jonë” nuk do i kishte njohur njeri në lagje jo më deri në qytetet e tjera

Por vitet e fundit, i zënë me dhjetra zanate të tjera, Rama ka qenë i kushtëzuar të heqë dorë nga dashuria e tij e hershme.

Faktet kanë treguar që Rama mund ta bëjë sërish edhe gazetarin politik. Në të njëjtin nivel siç bëri piktorin, aktorin, këngëtarin, shkrimtarin.

Megjithatë nuk i dihet a e ka mësuar që gazetarët e mirë nuk shkruajnë për veten. Këtu sikur bëhet lëmsh kryeministri.

Valmora Gogo/ Kryeredaktore
Valmora Gogo është gazetare dhe lektore e Komunikimit dhe e Gazetarisë. Prej 17 vitesh ajo kontribuon në hapësirën mediatike në Shqipëri, duke nisur që prej gazetës Shekulli e deri te mediet online si Newsbomb.al, Shuplaka.al dhe Hashtag.al. Gogo mban gradën “Doktor në Gazetari dhe Shkenca Komunikimi” dhënë nga Departamenti i Gazetarisë dhe Komunikimit në Fakultetin e Historisë dhe Filologjisë, Universiteti i Tiranës. E fokusuar në kërkim dhe kryesisht në politikë, Gogo kujdeset në informimin e saktë të opinionit publik shqiptar.

One Comment to: Kryeministri shqiptar realizon ëndrrën në fund të mandatit të dytë

  1. Avatar
    October 18th, 2020

    Hello, I think your site might be having browser compatibility issues. When I look at your blog in Chrome, it looks fine but when opening in Internet Explorer, it has some overlapping. I just wanted to give you a quick heads up! Other then that, fantastic blog!

    Reply

Leave a Reply

  • (not be published)