Protesta në ditën e 23-të ka marrë një karakter tjetër. Dritan Goxhaj ka shpallur në podium 5 pikat e kërkesave të grupit koordinues të protestës. Ai tha se piketat janë të panegociueshme pasi janë shkruar në bazë të propozimeve nga qytetarët në 23 ditë qëndresë në shesh me thirrjet për rrëzimin e qeverisë dhe bërjen e “Shqipërisë së Re”. Sipas Goxhajt po synohet një ndryshim rrënjësor i sistemit politik dhe ligjor.
5 pikat kryesore të platformës:
- Dorëheqja e panegociueshme e Kryeministrit Edi Rama dhe e të gjithë kabinetit qeveritar.
- Krijimi i një qeverie teknike tranzitore, e cila do të jetë jopartiake dhe do të ketë një mandat të qartë 12-mujor.
- Hartimi i një Kushtetute të re që garanton barazinë e plotë të shtetasve para ligjit, e cila do të miratohet me referendum popullor. Kjo reformë kushtetuese parashikon:
- Ndryshimin e Kodit Zgjedhor;
- Ndryshimin e ligjit për financimin e partive politike dhe organizatave;
- Kufizimin e mandatit të Kryeministrit në jo më shumë se dy mandate (të plota ose të pjesshme) gjatë gjithë jetës politike të një individi.
- Mosheqja dorë nga kërkesat fillestare ekonomike dhe mjedisore, ku kërkohet urgjentisht:
- Anulimi i ndryshimeve në ligjin për “Zonat e Mbrojtura”;
- Anulimi i ndryshimeve në ligjin për “Trashëgiminë kulturore”;
- Shfuqizimi i paketës ligjore të njohur si “Paketa e Maleve”;
- Shfuqizimi i statusit dhe kuadrit ligjor për “Investimet Strategjike”.
- Një kontratë e re sociale mes qytetarëve dhe shtetit, e cila do të përpilohet përmes konsultimeve me intelektualë, ekspertë teknikë dhe qytetarë apartiakë të propozuar direkt nga sheshi i protestës.
