I vuri pistoletën në kokë, po arma nuk u shkrep. Skena alarmoi klientët të cilët ishin duke qënduar të qetë në një lokal në mes të ditës në Elbasan. Ermir Bitoçi, i njohur si Ermir Kërtezi i shpëtoi atentatit. Ai doli i qetë nga lokali. Pasi bëri pak hapa është ndjekur nga pas nga 52-vjeçari Poli Boriçi. Atentatori ia vuri pistoletën në kokë, por arma u bllokua. Kërtezi ndjeu se po sulmohej. Ai reagoi duke e shmangur armën nga vetja dhe më pas u largua me vrap. Boriçi vijoi ta ndiqte, por pa mundur ta qëllonte.
Para ngjarjes dukej se gjithçka shkonte mirë. Secili ishin të ulur në tavolina të ndryshme. Boriçi pinte kafe i ulur në një tavolinë me një grua. Ai nxitoi të ngrihej kur Kërtezi doli jashtë. Pavarësisht se personi me të cilin po pinte kafe u ngrit të vriste një njeri, gruaja që ishte me të, vijoi të rrinte e qetë e të ndiqte veprimet e ulur, thjesht duke kthyer kokën e më pas të ngrihej për të parë se çfarë po ndodhte pak më tutje. Me të njëjtën qetësi ulet dhe vijon të qëndrojë aty. E gjithë kjo skenë është fiksuar nga kamerat ambientale që tregojnë lëvizjet e personit të shënjestuar për t’u vrarë, atentatorit dhe gruas që pinte e qetë kafenë e ulur në tavolinë me të.
Komentuesit në rrjetet sociale kanë nisur të çuditen me qetësinë e gruas. Policia ka vënë në pranga Poli Boriçin dhe ka sekuestruar armën. Ai është shpallur i dyshuar për tentativë vrasje.
Hetimet e para
Poli Boriçi ka deklaruar në polici se donte të hakmerrej për vëllanë e tij. Sipas dëshmisë mes dy familjeve Kërtezi e Boriçi ka patur një konfikt. Sipas “News 24” Boriçi ka pretenduar se Kërtezi kishte plagosur vëllain e tij rreth 15 vite më parë. Më pas i lënduari kishte kaluar në paralizë.
Nga ana tjetër Kërtezi është shprehur se marrëdhëniet mes tyre ishin normalizuar. Ai pohoi se prej 15 vitesh familjet banonin pranë njëra-tjetrës, pa pasur konflikte. Emri i Kërtezit lidhet me trazirat e viti 1997 në Elbasan, ku më pas është larguar nga vendi. Policia nuk ka dhënë ende detaje mbi ngjarjen, ndërsa vijojnë hetimet.
