Ministrat kanë nisur t’u binden sugjerimeve të këshilltarit për mediat të Kryeministrisë Endri Fugës, për shpërndarjen në rrjete sociale. Me nisjen e vitit të ri shkollor, përpos ministres së Arsimit dhe Sportit Ogerta Manastirliut që është pjesë e punës së saj, duket se i gjithë kabineti qeveritar është investuar të shpërndajë të njëjtat mesazhe.
Duke nisur nga ministri i Drejtësisë Ulsi Manja, ministri i Financave Petrit Malaj, ministri i Mbrojtjes Pirro Vengu, ministrja e Bujqësisë dhe e Zhvillimit Rural Anila Denaj e me radhë… ministrat kanë publikuar dy ditët e fundit, mesazhe të ngjashme për arsimin në rrjetet sociale. Madje pjesa më e madhe e tyre ka bërë copy-paste të njëjtin postim, me tekst dhe foto të njëjtë.
Në mbledhjen e qeverisë të mbajtur në Dajt më 1 shtator, një nga çështjet kryesore që u diskutua ka qenë strategjia e komunikimit që maxhoranca socialiste do të ndjekë në vazhdimësi deri në zgjedhjet parlamentare të vitit 2025. Këshilltari Endri Fuga ishte ai që e drejtoi këtë sesion të posaçëm diskutimesh dedikuar komunikimit, ku u kërkoi ministrave të fokusohen te rrjetet sociale dhe të rrisin numrin e shpërndarjeve.
