Skema-dhuratë për festat e fundvitit 2021 këtë herë përfshin eksponentë të njohur e të përfolur që lidhen me Bashkinë e Tiranës dhe Drejtorinë e Përgjithshme të Patentave, në krye të së cilës është Blendi Gonxhja.
Erind Bejleri, miku i Endri Fugës dhe drejtorit të Erion Veliajt, Ditjon Baboçit (dhëndërri i Fatmir Xhafajt) do paguhet 125 milionë lekë të vjetra për dy muaj.
Arsyeja? Projektimi i godinës së re të Drejtorisë së Përgjithshme të Shërbimeve të Transportit Rrugor.
Socialistët kanë vendosur që në vend të investimit në sektorë të tjerë, në të cilët vendi ka kaq shumë nevojë, të investojnë në godina, duke i besuar projektin Erind Bejlerit.
Nëpërmjet kompanisë “SON Engineering & Construction”, i ftuar me interes maksimal nga vetë z.Gonxhja, Bejleri ka dy muaj kohë për të krijuar projektin, nga i cili do të përfitojë mbi 60 milionë lekë për çdo 30 ditë.
Bejleri është lakuar edhe më herët si një nga përfituesit e mëdhenj të tenderave në Bashkinë e Tiranës. Njihet si mik i Ditjon Baboçit, drejtori i Përgjithshëm i Planifikimit dhe Zhvillimit të Territorit në Bashkinë e Tiranës, me gjasë i zhvendosur në ndonjë pozicion tjetër dhe Endri Fugës, drejtorit të Komunikimit në Kryeministri.
Para disa javësh në Shqipëri rrodhën të dhënat nga disa databaza, si pagat e janarit dhe prillit 2021 si dhe të dhënat mbi automjetet dhe targat. Një sërë të dhënash u publikuan edhe sa u përket këshilltarëve të institucioneve, Bashkisë së Tiranës, apo pagave në funksione të tjera.
Me sa duket në këto skema, të cilat duhen hetuar nga SPAK-u, u qarkullokan më shumë para se pagat mujore të këshilltarëve.
