Ka pësuar një zhvendosje të ndjeshme teza e kërkimit të drejtësisë këto 10 vite në Shqipëri ndërsa pushtetet kanë filluar të mbivendosen e tejkalojnë njëri-tjetrin.

Edhe pse Kushtetuta e Republikës përcakton me saktësi në nenin 7 të saj se sistemi i qeverisjes në Republikën e Shqipërisë bazohet në ndarjen dhe balancimin ndërmjet pushteteve ligjvënës, ekzekutiv dhe gjyqësor, sërish ne mund ta shohim e dëgjojmë këtë rrëshkitje pushtetesh. Edhe publikisht.

Në gazetari ka një parim të rëndësishëm që profesionistët e respektojnë, siç është ai i prezumimit të pafajësisë, ku askush nuk duhet të cilësohet fajtor para vendimit të gjykatës. Kështu ky parim, i tregon medies që në fakt është “pushteti i katërt”, se si duhet të presë fjalën e pushtetit gjyqësor dhe duhet ta respektojë këtë pushtet në vendimet e tij.

Në Shqipëri duket se nuk ndodh shpesh që ky pushtet gjyqësor të respektohet nga një pushtet tjetër edhe më i kontrolluar nga qytetarët nëpërmjet votës, siç është ai ekzekutiv, në majë të të cilit qëndron kryeministri Edi Rama.

Po çfarë ka ndodhur këto 10 vjet?

Faktet tregojnë se kreu i ekzekutivit ka tejkaluar publikisht kompetenca të pushteteve të tjera dhe këtë e ka bërë sidomos me punën e prokurorisë, që vepron pranë sistemit gjyqësor. Është Rama që në të paktën 5 raste ka orientuar jo vetëm opinionin publik nëpërmjet retorikës së tij politike por ka folur para se ekspertët të flasin, duke orientuar se si rrjedha e ngjarjeve duhet të zhvillohet.

Ndërsa më parë premtonte se do kërkonte drejtësi pas vrasjes së 4 protestuesve në 21 janar 2011, rastet që do analizohen më poshtë tregojnë se si Rama ka ndërhyrë nëpërmjet komunikimeve të tij në sistemin e drejtësisë. Prokuroria ushtron ndjekjen penale dhe përfaqëson akuzën në gjyq në emër të shtetit. Praktikisht, vendimet e gjykatave varen nga puna e prokurorëve.

Rasti 1 – Saimir Tahiri

Është ndoshta rasti më flagrant, i cili ka nxitur edhe reagimin e mëpasshëm të vetë prokurorisë.

Pas dyshimeve publike për Saimir Tahirin, ministrin e Punëve të Brendshme të asaj kohe se ishte i përfshirë në trafik droge, dyshime që më pas u artikuluan në akuza konkrete nga prokuroria mes të cilave spikaste trafiku ndërkombëtar i drogës, kryeministri vendosi ta shkarkojë përkohësisht nga grupi parlamentar.

Por gjatë këtij veprimi ai tejkaloi kompetencat duke sulmuar prokurorinë, ndërsa ajo ishte në hetim të Tahirit.

“Ku u gjet ky zell i panjohur i një prokurorie të Krimeve të Rënda që nuk ka lëvizuar asnjë gisht që kur ka lindur? As për fakte e prova që dihen e shihen ashiqare si shumë të dyshimta. Kurrë. Asnjëherë…Në cilën epokë të gurit u gjet kurajoja për t’i prerë faturën e burgut deputetit me katër fletë bakalli që do të ofendonin çdo bakall…dhe për llogari të kujt deshën t’ia shesin këtë faturë të arrestit me burg këta prokurorë? Kështu i luftojnë kriminelët…”, u shpreh asokohe Rama, duke vazhduar: “Është kopje surrogato e gjyqit politik që e kemi parë 4 vite në Parlament.”

Prokuroria e quajti deklaratën e Ramës si “…në të kundërt të asaj që është deklaruar për dy vite me radhë-Reformën në Sistemin e Drejtësisë”, duke theksuar se kryeministri ka shprehur opinionin e tij mbi provat e paraqitura teksa kishte marrë “rolin e gjykatës, një atribut që nuk i takon as me Kushtetutë dhe as me ligj”.

Rasti 2- Audiopërgjimi ku implikohej emri i vëllait të Fatmir Xhafajt

Mbrojtja publike e kryeministrit Rama duke intimiduar prokurorinë ka vazhduar edhe me një ish-ministër tjetër, Fatmir Xhafajn.

Fjala është për audiopërgjimin e çështjes së mirënjohur, të cilës iu vu nofka “Babalja”, ku implikohej për trafik droge emri i vëllait të ish-ministrit.

Kryeministri shqiptar deklaronte asokohe se kishte pajtuar një agjenci private ekpertize.

“Unë e kam marrë mbrëmë përgjigjen e analizës shkencore të kryer në një ndër laboratorët më seriozë të botës, mua ajo përgjigje më mjafton. Po bëj një parantezë, jo për të bërtitur montazh-montazh. Po më mjafton për t’ju thënë juve se nuk jemi përpara një akti kompromentues të ministrit të Brendshëm po akti mashtrimi të një materiali autentik…”, deklaronte publikisht Rama.

Rasti 3-Fotot e morgut

“Inskenime të turpshme”, i quante fotot e morgut në QSUT gjatë pandemisë kryeministri Rama, foto që tregonin një situatë të rëndë me mënyrën se si ishin sistemuar kufomat duke interpretuar më tej: “Opozita dhe presidenti po bëjnë aleancë me Covidin për të rrëzuar qeverinë duke shpërndarë foto klandestine nga morgu i spitalit. Kjo është haptazi jonjerëzore. Po bëjnë politikë me lajme të rreme për numrin e të vdekurve.”

Edhe kësaj here, nuk hezitoi t’u paraprinte rezultateve të hetimit, duke i thënë prokurorisë siç mund ta interpretojmë me pak fjalë “bëj çfarë të duash po mendo se çfarë po bën”.

“Prokuroria e di vetë detyrën e saj nëse do përfshihet për zbardhjen e ngjarjes askush nuk do e pengojë. Por kjo gjë duhet mbajtur shënim nga gjykatësi suprem që është populli. Akuzat e opozitës mund të nxisin dhunën ndaj mjekëve nga ana e familjarëve që kanë humbur të afërmit e tyre”, tha Rama.

Fotot rezultuan të vërteta.

Rasti 4- Vrasja e 25-vjeçarit Klodian Rasha

Në një vendim të qeverisë të tij vrasjen e 25-vjeçarit Klodian Rasha nga një efektiv, ngjarje që nxiti protesta disaditore në Tiranë, kryeministri Rama e quante aksidentale, duke marrë pozicionin e organit të akuzës.

I gjendur përballë presionit të publikut dhe situatës së protestave në rrugë Rama nxitoi të korrigjonte togfjalëshin, duke mohuar se kishte marrë rolin e një gjykatësi dhe tha se ngjarja nuk kishte qenë aspak aksidentale kur u pyet nga gazetarët.

“Kjo është një nga çorbat që keni bërë ju. Një çorbë që ka trazuar shpirtrat e njerëzve, që ka ose qëllim të keq ose padije. E para nuk është akt normativ, është një vendim qeverie. E dyta pikërisht pse qeveria nuk është gjykatë, dhe pse nuk mund të marrë përsipër të bëjë rolin e gjykatës është përdorur thjesht dhe vetëm një term juridik, teknik, për të përcaktuar arsyen e dhënies së pensionit. Dhe është thënë aksidentalisht nga veprimi i forcave policore. Kjo do të thotë që personi që humbi jetën tragjikisht, nuk ka qenë objekt i ndonjë misioni policor, por ka humbur jetën në kushte të një përplasjeje aksidentale.”, tha Rama.

Rasti 5-Sanitarja Tire

Rasti më i fundit është rasti i sanitares Tire Alldërvishi, në spitalin “Shefqet Ndroqi”.

Edhe këtë herë kryeministri Rama e dinte me siguri se sanitarja që akuzohet për marrjen e 8 milionë lekëve të vjetra nga vajza e një pacienteje që ndërroi jetë nga Covid 19 nuk ishte e lidhur me mjekë të tjerë.

“Realisht e vetmja gjë që më ka pëlqyer, apo ngrohur në atë ngjarje ka qenë puna e bërë nga gazetarët investigativë se kanë nxjerrë në pah një llum, natyrisht të papërtypshëm por njëkohësisht nuk kanë provuar përkundrazi, do të thosha që të gjithë investigimet e tyre nuk ka rezultuar që ajo sanitare të ishte e lidhur me mjekë e ky të ishte një zinxhir.”, tha kryeministri shqiptar.

Këto 5 qëndrime mund të jenë të vetmet në llojin e tyre, ku kryeministri i një vendi del mbi kompetencat e prokurorisë e gjykatës, sulmon, intimidon apo parashikon punën e tyre.

Mbase 5 rastet shqiptare mund të jenë unike në përmasat e skandalit e tragjikes edhe po të kërkosh në vende të tjera të botës.

Dikush do thoshte se këto ndodhin edhe në botë, madje bëhen dhe filma.

Valmora Gogo
Valmora Gogo është gazetare dhe lektore e Komunikimit dhe e Gazetarisë. Prej 17 vitesh ajo kontribuon në hapësirën mediatike në Shqipëri, duke nisur që prej gazetës Shekulli e deri te mediet online si Newsbomb.al, Shuplaka.al dhe Hashtag.al. Gogo mban gradën “Doktor në Gazetari dhe Shkenca Komunikimi” dhënë nga Departamenti i Gazetarisë dhe Komunikimit në Fakultetin e Historisë dhe Filologjisë, Universiteti i Tiranës. E fokusuar në kërkim dhe kryesisht në politikë, Gogo kujdeset në informimin e saktë të opinionit publik shqiptar.

Leave a Reply

  • (not be published)