Institucionet e kulturës, policisë dhe prokurorisë në vend duket se nuk po mundin të koordinohen për ruajtjen e objekteve të trashëgimisë kulturore. Amfora.al shkruan në një artikull se pavarësisht marrëveshjeve dhe memorandumeve të bashkëpunimit me vendet si SHBA, autoritetet shqiptare nuk kanë arritur rezultate konkrete në ruajtjen dhe identifikimin e objekteve arkeologjike, shpesh duke lënë pas objekte të çmuara të trashëgimisë të shkatërrohen ose të kalojnë në duar të papërgjegjshme. Si shembull artikulli përmend gjetjet në rrugën Levan-Tepelenë dhe shpërndarjen e objekteve të trafikuara, si mozaikë dhe fragmente arkitekturore, të cilat sipas banorëve janë mbuluar ose nuk janë ruajtur siç duhet. “Ka që ndalojnë dhe pyesin për mozaikun e gjetur, por ç’ti tregojmë?! Gjynah i madh të gjesh mozaik dhe ta mbulosh.”-rrëfeu Baftjar Hysa, një banor i Qesaratit.
Marrëveshjet ndërinstitucionale dhe bashkëpunimi ndërkombëtar për ruajtjen e këtyre objekteve janë lënë shpesh thjesht në letër dhe nuk kanë sjellë rezultate të prekshme. Prokuroria dhe institucionet e tjera pranojnë se nuk kanë statistika të qarta për pasuritë kulturore të grabitura ose të trafikuara, ndërkohë që operacionet policore për ndalimin e këtyre veprave kanë pasur pasoja të pakta. Përveç kësaj, ndihma ndërkombëtare nga Shtetet e Bashkuara dhe vendet fqinje ka pasur më shumë sukses thjesht në rikthimin e pasurive kulturore të trafikuara në origjinën e tyre.
Për më shumë lexo artikullin origjinal të Amfora.al
