Pronari miliarder i teknologjisë dhe platformës “X” e ka quajtur Scholzin një “budalla i paaftë” dhe ka kërkuar dorëheqjen e tij. Musk-u do të përdorë gjithashtu platformën e tij për të organizuar një bisedë të gjatë me Alice Weidel, udhëheqësen e partisë ekstremiste të djathtë AfD në Gjermani. Për shumë politikanë gjermanë, kjo duket si një ndërhyrje politike, me AfD-në që renditet e dyta në sondazhe përpara zgjedhjeve federale më 23 shkurt. “Duhet të qëndroni të qetë. Mos ushqeni provikimin.”– tha Scholz. Megjithëse disa liderë evropianë, si kryeministrja e Italisë, Giorgia Meloni kanë gjetur mbështetje tek Musk, të tjerët e kanë të vështirë ta injorojnë ndërsa ai ndërhyn në politikën e brendshme përpara një roli të ri si këshilltar i presidentit të ardhshëm të SHBA-së, Donald Trumpit.
Katër qeveri evropiane kundërshtojnë Musk-un
Brenda 24 orëve, katër qeveri evropiane kanë kundërshtuar postimet e Musk-ut. Presidenti francez Emmanuel Macron ishte ndër të parët që kritikoi këtë të hënë: “Para 10 vitesh, kush do ta kishte besuar nëse do të na kishin thënë se pronari i një prej rrjeteve më të mëdha sociale në botë do të mbështeste një lëvizje të re reaksionare ndërkombëtare dhe të ndërhynte drejtpërdrejt në zgjedhje, përfshirë në Gjermani?”-tha ai. Kryeministri norvegjez Jonas Gahr Store u shpreh gjithashtu, duke thënë se e shihte “shqetësuese që një njeri me akses të madh në rrjetet sociale dhe burime të konsiderueshme ekonomike është kaq drejtpërdrejt i përfshirë në çështjet e brendshme të vendeve të tjera.” Zëdhënësja e qeverisë spanjolle, Pilar Alegría, tha se “platformat digjitale si “X” duhet të veprojnë me të pavarura dhe mbi të gjitha pa asnjë lloj ndërhyrjeje.”
Sulme ndaj Mbretërisë së Bashkuar dhe përjashtime në Evropë
Në ditët e fundit, Musk-u ka shkruar disa postime që sulmojnë kryeministrin britanik Keir Starmer dhe administratën e tij për çështjet e dhunës seksuale dhe shfrytëzimit të fëmijëve. Starmer, pa përmendur Musk, tha: “Ata që përhapin gënjeshtra dhe dezinformata nuk janë të interesuar për viktimat, por për vetveten.” Dy përjashtime të dukshme në Evropë janë Italia dhe Hungaria. Kryeministrja italiane Giorgia Meloni e quan Musk një “gjeni” dhe një “inovator të jashtëzakonshëm.” Kryeministri hungarez Viktor Orban, i cili u takua me Musk-un gjatë një vizite te Trump në Mar-a-Lago muajin e kaluar, ndan antipatinë me Musk për George Soros.
Ndërhyrja më e diskutueshme në Gjermani
Ndërhyrja e Musk në politikën gjermane është më e diskutueshme për shkak të zgjedhjeve të afërta. Ai ka mbështetur disa herë AfD-në javët e fundit dhe ka shkruar një artikull polemik për “Welt am Sonntag,” duke e quajtur AfD-në “shpresa e fundit për Gjermaninë.” Musk ka justifikuar ndërhyrjen duke përmendur investimet financiare të kompanisë së tij Tesla në Gjermani, duke thënë se portretizimi i AfD-së si ekstremiste e djathtë ishte “qartësisht i rremë” për shkak se Alice Weidel ka një partnere të gjinisë së njëjtë nga Sri Lanka.
Elon Musk në fabrikën e tij të Tesla-s, Gjermani.
Shërbimet gjermane të sigurisë e kanë etiketuar AfD-në si ekstremiste të djathtë ose të dyshuar për ekstremizëm, dhe gjykatat kanë vendosur se ajo ndjek qëllime kundër demokracisë. Ndërsa Scholz ka tentuar të qëndrojë i qetë, kandidati i të Gjelbërve për kancelar, Robert Habeck, ishte më i prerë: “Larg duart nga demokracia jonë, zoti Musk.” Lideri liberal Christian Lindner ka sugjeruar se qëllimi i Musk mund të jetë dobësimi i Gjermanisë në interes të SHBA-së, “duke rekomanduar votimin për një parti që do të na dëmtonte ekonomikisht dhe do të na izolonte politikisht.”
Hetimet e BE-së dhe bizneset në Itali
Ish-kreu i agjendës digjitale të Komisionit Evropian, Thierry Breton, paralajmëroi në “X” se biseda e drejtpërdrejtë e Musk-ut me Weidel-in mund t’i jepte asaj një avantazh të rëndësishëm ndaj konkurrentëve. Komisioni Evropian ka thënë se rregullat e BE-së për Shërbimet Digjitale nuk ndalojnë një transmetim të drejtpërdrejtë apo shprehjen e opinioneve personale, por një zëdhënës paralajmëroi se pronarët e platformave nuk duhet të ofrojnë “trajtim preferencial.” Ndërkohë, Musk-u po zgjeron interesat e tij të biznesit në Itali. Kryeministrja Meloni ka qenë në një darkë me Trump në Mar-a-Lago kur u raportua se Italia po negocionte një marrëveshje me SpaceX për 1.6 miliardë dollarë, për shërbime të sigurisë digjitale. Opozita në Romë ka shprehur shqetësime për përfshirjen e Musk në çështje delikate ndërsa sponsorizon të djathtën ekstreme në Evropë.
Elon Musk dhe Giorgia Meloni
Ky shkrim është pronësi intelektuale e “BBC News”. Lexo Këtu artikullin origjinal.
