Demokratët në Kongresin Amerikan këmbëngulin në hetimin e dhëndrrit të presidentit amerikan Jared Kushner dhe lidhjes së tij me kryeministrin shqiptar Edi Rama dhe Artur Shehun, nga i cili kompania e Kushnerit ka blerë tokën në Zvërnec.
Në një letër të dytë dërguar posaccërisht Kushnerit, pasi te e para nuk ka kthyer përgjigje, kongresmeni Jamie Raskin i komisionit për Çështjet Gjyqësore të Dhomës së Përfaqësuesve i kërkon atij vënien në dispozicion të të gjitha korrespodencave mes tij dhe Ramës lidhur me Zvërnecin dhe Sazanit.
Letra përmban detaje të mënyrës se si në Amerikë zhvillohen hetime të këtyre përmasave dhe shfaqet qartë dimensioni i kërkimit të llogarisë. Madje Raskin i ka vendosur Kushnerit edhe një afat kohor për përgjigjen: jo më vonë se ora 17:00 e datës 7 shtator 2026.
LETRA E PLOTË
I nderuar z. Kushner,
Mund të keni qenë tepër i zënë duke shkaktuar një fiasko të re politikës së jashtme në Shqipëri, pas aventurës suaj me jaht në Adriatik, për t’iu përgjigjur disa pyetjeve që kemi në lidhje me konfliktet tuaja të hapura të interesit, të cilat po ndodhin pikërisht këtu, në Amerikë.
Prandaj, në rast se kishit harruar ekzistencën e një hetimi të Kongresit mbi konfliktet tuaja të interesit dhe praktikat korruptive të biznesit, po ju shkruaj për t’ju kujtuar detyrimin tuaj për t’iu përgjigjur kërkesave hetimore të Kongresit, si dhe për t’ju njoftuar se e kemi zgjeruar hetimin tonë për të përfshirë edhe praktikat tuaja të dyshimta në sektorin e pasurive të paluajtshme.
Më 16 prill 2026, ju shkrova në lidhje me shqetësimet e thella të ngritura nga anëtarë të Kongresit për vendimin tuaj për të kërkuar investime private nga fuqi të huaja për bizneset tuaja personale, ndërkohë që veproni gjithashtu si një prej negociatorëve kryesorë të qeverisë së Shteteve të Bashkuara në konflikte ndërkombëtare – rastësisht, konflikte në të cilat vetë investitorët tuaj janë të përfshirë drejtpërdrejt ose tërthorazi.
Nga këndvështrimi i popullit amerikan, vendimi juaj për t’i ushtruar njëkohësisht këto dy role- njërin publik, në shërbim të qeverisë, dhe tjetrin privat, për përfitim personal- ka krijuar një konflikt interesi të dukshëm dhe të pazgjidhshëm, veçanërisht kur 97% e fondeve që keni mbledhur për kompaninë tuaj të investimeve vijnë drejtpërdrejt nga fondet sovrane të qeverive të huaja, subjektet tregtare të lidhura me to dhe shtetas të huaj.
Ju nuk i jeni përgjigjur asaj letre. Edhe kur stafi im kontaktoi Affinity-n, përsëri nuk morëm përgjigje. Për t’ju dhënë përfitimin e dyshimit, po supozoj se mund të keni qenë tepër i shpërqendruar dhe i angazhuar me përpjekjet tuaja të përsëritura dhe të dështuara për të negociuar një armëpushim të qëndrueshëm në Iran, Liban ose Ukrainë. Ose mund të keni qenë i preokupuar me demonstratat masive të organizuara nga populli shqiptar në shenjë proteste kundër planeve tuaja për të ndërtuar një resort luksoz, me pasoja shkatërrimtare për mjedisin, pranë ishullit të Sazanit dhe vijës bregdetare të Zvërnecit aty pranë, një zonë e mbrojtur që shërben si habitat për qindra shpendë shtegtarë dhe kafshë ujore.
Sipas raportimeve të publikuara, bashkëshortja juaj, Ivanka Trump, ka deklaruar se ju kishit “gjetur” një ishull pranë bregdetit shqiptar gjatë lundrimit me jaht nëpër Adriatik. Sigurisht, ju nuk e “gjetët” atë: Sazani është përdorur herë pas here si instalim ushtarak, që nga periudha romake, përgjatë Perandorisë Osmane dhe deri kur, kohët e fundit, u shndërrua në një zonë të mbrojtur mjedisore dhe strehë për botën e egër. I pandalur nga kjo, ju mblodhët disa partnerë miliarderë nga Katari dhe nisët një plan për ndërtimin e një resorti luksoz për njerëz jashtëzakonisht të pasur, pranë ose mbi ishull. Qeveria e kryeministrit shqiptar Edi Rama, e cila prej kohësh është përpjekur të ndikojë në politikën amerikane, ju dha miratimin, por kryeministri nuk arriti të siguronte miratimin e elektoratit të tij për projektin tuaj të ëndrrave.
Në vend të kësaj, qytetarët shqiptarë kanë dalë në rrugë për të protestuar, ndërsa prokurorët shqiptarë kanë ngrirë pasuri potencialisht të përfituara në mënyrë mashtruese, të lidhura me blerjen tuaj të tokës në Zvërnec, pasi rezultoi se shitësi nuk ishte pronari i vërtetë i saj. Megjithëse keni pretenduar se nuk kishit dijeni për pretendimet mashtruese të shitësit, The Ëall Street Journal zbuloi së fundmi se e kishit blerë tokën në fjalë nga Artur Shehu – një person i dyshuar si gangster dhe trafikant droge, me një histori të falsifikimit të dokumenteve të pronësisë – edhe pasi banorët vendas ju kishin shkruar për t’ju paralajmëruar se z. Shehu nuk kishte titull të ligjshëm pronësie mbi tokën. Pavarësisht kësaj, ju vazhduat përpara, i paguat z. Shehu më shumë se 120 milionë dollarë dhe pretenduat pronësinë mbi zonën e kontestuar. Ndërkohë, skuadra juaj private e sigurisë sulmoi banorët vendas që guxuan të protestonin kundër asaj që konsideronin si përvetësim të dyshimtë të tokës nga ana juaj.
Ky episod pasqyron si mendjelehtësinë tuaj thelbësore në rolin e dikurshëm si përfaqësues i Shteteve të Bashkuara, ashtu edhe oreksin mbizotërues dhe në dukje të pangopur të familjes Trump-Kushner për t’u përfshirë në korrupsion politik dhe financiar. Ndërsa veproni si kryenegociatori i vendit tonë për përfundimin e disa konflikteve ndërkombëtare, të krijuara ose të përkeqësuara nga administrata e vjehrrit tuaj, keni gjetur kohën për të shkaktuar, krejt i vetëm, një tjetër incident ndërkombëtar të lidhur me mashtrimin. Gjithashtu, ju janë ofruar lehtësi dhe privilegje të konsiderueshme financiare nga një qeveri e huaj, e dëshpëruar për të fituar favorin e Shteteve të Bashkuara, ndërkohë që ju, si dhëndri i Presidentit, veproni si një zyrtar qeveritar de facto.
Për këtë arsye, përsërisim kërkesat tona të mëparshme dhe shtojmë më poshtë disa të tjera, përfshirë ato që janë të nevojshme për të përcaktuar nëse sjellja juaj duhet të hetohet në bazë të Ligjit për Praktikat Korruptive Jashtë Vendit (Foreign Corrupt Practices Act – FCPA) dhe nëse duhet të nxisë reforma legjislative.
Komisioni për Çështjet Gjyqësore i Dhomës së Përfaqësuesve po heton sjelljen tuaj, si dhe atë të kompanisë dhe partnerëve tuaj të biznesit, me qëllim sigurimin e informacionit thelbësor për reformimin e ligjeve tona kundër ryshfetit, dispozitave për konfliktin e interesit, statuteve dhe rregullave të tjera që rregullojnë veprimtarinë e punonjësve të qeverisë dhe të punonjësve të posaçëm qeveritarë, Ligjit për Regjistrimin e Agjentëve të Huaj dhe FCPA-së. Ju lutemi të paraqisni dokumentacionin e mëposhtëm, së bashku me dokumentacionin që u përgjigjet kërkesave të mia të mëparshme, jo më vonë se ora 17:00 e datës 7 shtator 2026:
- Të gjitha dokumentet dhe komunikimet ndërmjet jush ose çdo subjekti të lidhur me ju dhe çdo përfaqësuesi të qeverisë shqiptare, që kanë të bëjnë me pasuri të paluajtshme, marrëveshje biznesi ose protesta në atë vend;
- Të gjitha dokumentet dhe komunikimet ndërmjet jush ose çdo subjekti të lidhur me ju dhe çdo përfaqësuesi të qeverisë së Shteteve të Bashkuara, që kanë të bëjnë me pasuri të paluajtshme, marrëveshje biznesi ose protesta në Shqipëri; dhe
- Të gjitha dokumentet që lidhen me miratimin ose shqyrtimin e çdo projekti të pasurive të paluajtshme në Shqipëri, duke përfshirë, por pa u kufizuar në, blerjet, miratimet qeveritare, pagesat ose investimet.
Ju falënderoj për vëmendjen tuaj të menjëhershme ndaj këtyre kërkesave të rëndësishme për mbikëqyrje. Pres bashkëpunimin tuaj, ndonëse të vonuar, por të plotë, për këtë çështje.
Me respekt,
Jamie Raskin
Anëtar i lartë i pakicës në Komision
