Sportisti estonez Jaan Roose ka hyrë në histori si personi i parë në botë që ka bërë një kalim ndërkontinental mbi një litar të ngushtë dhe mbi të gjitha në 165 metra lartësi. Ai kaloi ngushticën e Bosforit, që konsiderohet si një ndarje natyrore midis Evropës dhe Azisë.
Video e tij duke e bërë këtë u bë shumë shpejt virale në media dhe në rrjetet sociale. Sportisti 32-vjeçar kaloi Bosforin në Stamboll, duke filluar nga pjesa aziatike e ngushticës dhe duke mbyllur kalimin e tij në anën evropiane. Siç shkruan “The Sun”, Roose eci mbi një litar të posaçëm, pak më shumë se një kilometër të gjatë, saktësisht 1,074 metra, i cili lidhte dy polet e urës së famshme. Dhe për të bërë këtë iu deshën pak më pak se 50 minuta për të përfunduar kalimin.
Gjatë marifetit të së dielës ai luftoi kundër erërave me shpejtësi 13 mph dhe në temperaturën 23 gradë Celsius. Roose tha: “Moti i Stambollit dhe kushtet e erës ishin të ndërlikuara, por kjo është ajo që e bën atë emocionues. Çdo performancë sjell grupin e vet të sfidave. Ka të bëjë me përshtatjen, qëndrimin i përqendruar dhe besimin në përgatitjen dhe aftësinë tënde. Kam bërë histori, kështu që jam shumë i lumtur!”. Sportisti estonez ka kaluar më parë dhe ngushticën e Mesinës midis Siçilisë dhe Italisë kontinentale në një version më të lirë të litarit tradicional.
Kush është Jan Roose?
Jaan Roose ka lindur më 11 janar të vitit 1992 në Setomaa, Estoni. Ai është i njohur për manofrat e tij në filmat e Hollivudit si: Assassin’s Creed (2016), Wonder Woman 1984 (2020) dhe Boundless (2024). Kur Jaan Roose filloi këtë sport, ai kurrë nuk e kishte ëndërruar se një ditë do të emociononte turmat në të gjithë botën me truket e tij unike. Tani ai është 3 herë kampion bote dhe mbajtës i rekordeve të shumta të tjera botërore në këtë sport, shkruan revista “Lacrux“.
Para disa muajsh, Jaan Roose përshkoi dhe ngushticën e Mesinës në një vijë 3646 m të gjatë, duke kaluar nga kontinenti Italian për të përfunduar në Siçili. Metrat e fundit ishin veçanërisht intensive. Jaan Roose hyri në histori duke u bërë personi i parë që kaloi ngushticën e Mesinës në Itali në një linjë 3646 metra të gjatë. Roose e përfundoi kalimin në pothuajse tre orë, duke mposhtur distancën aktuale të rekordit botëror prej 2.710 metrash. Megjithatë, një rrëzim në 80 metrat e fundit e pengoi atë të vendoste zyrtarisht një rekord të ri botëror. Rregullat e sportit kërkojnë një kalim të plotë pa rrëzime.
