Alice Weidel, nga partia nacionaliste Alternativa për Gjermaninë, jeton në Zvicër dhe është e martuar me një grua me origjinë nga Sri Lanka. Ajo e ka udhëhequr partinë e saj drejt vendit të dytë përpara zgjedhjeve të së dielës. Kur zëvendëspresidenti JD Vance kritikoi pritësit e tij gjermanë javën e kaluar për margjinalizimin e partive të ekstremit të djathtë, ai nuk e përmendi me emër Alternativën për Gjermaninë (AfD). Por menjëherë pas fjalimit të tij në Konferencën e Sigurisë në Mynih, ku tronditi audiencën duke krahasuar demokracinë në Evropën e sotme me totalitarizmin e epokës sovjetike, Vance u takua me Alice Weidel, lideren e AfD-së.
Kush është Alice Weidel
Një ish-analiste investimesh që po rrit dy djem me gruan e saj me origjinë nga Sri Lanka në Zvicër. Weidel, 46 vjeç, është bërë fytyra e papritur e AfD-së. Partia e saj nacionaliste bazohet në një platformë kundër emigracionit dhe e përkufizon familjen si një baba dhe një nënë që rrisin fëmijë. E preferuara e administratës së re amerikane duke marrë edhe mbështetje nga Elon Musk, Weidel ka qenë thelbësore për përpjekjet e AfD-së për të depërtuar në politikën kryesore, duke ndihmuar partinë të ngjitet në një vend të sigurt të dytë përpara zgjedhjeve kombëtare të së dielës.
Stili i saj i veçantë, me pulovrat me jakë të lartë ose këmishat pa kravatë dhe varëset e perlave, i ka dhënë një imazh një partie që është lidhur me neo-nazistët dhe komplotet për rrëzimin e shtetit. Por AfD-ja e saj nuk është më pak ekstreme. “Me Alice Weidel në krye, AfD-ja është bërë gjithnjë e më radikale,” tha Ann-Katrin Müller, eksperte e AfD-së dhe gazetare në “Der Spiegel”. Suksesi i saj më i fundit në paraqitjen e AfD-së si një parti e zakonshme u shënua të dielën, kur ajo mori pjesë në një debat televiziv me rivalët e saj kryesorë, përfshirë Robert Habeck-in, kandidat i të Gjelbërve.
Performanca e Weidel u vlerësua e pabarabartë, por gjithsesi ajo doli e fituar, ishte hera e parë që AfD-ja ftohej në një debat të tillë, të ndjekur nga miliona votues. Në një moment gjatë fushatës, sondazhet e renditën atë si kandidaten më të popullarizuar për kancelare, mes të gjitha partive. Por nëse qëndrimi i saj akademik dhe historia personale sugjerojnë një zbutje të linjës së partisë, gjuha e saj nuk e reflekton këtë. Ajo ka premtuar të shkatërrojë turbinat e erës dhe të pushojë nga puna profesorët e studimeve gjinore. Ajo ka folur për “remigrim”, një term i përdorur nga e djathta ekstreme që interpretohet gjerësisht si një kod për dëbime masive.
“Bëjeni absolutisht të qartë për gjithë botën: kufijtë gjermanë janë të mbyllur,” tha ajo para një turme brohoritëse kur AfD-ja e emëroi zyrtarisht si kandidate muajin e kaluar. Weidel refuzoi të fliste për “The New York Times” për këtë artikull. Në intervistat me mediat gjermane, ajo ka qenë herë pas here tërheqëse dhe thumbuese. Ajo ka refuzuar vazhdimisht të distancohet nga anëtarët më ekstremë të partisë së saj, disa prej të cilëve kanë minimizuar Holokaustin dhe të kaluarën naziste të Gjermanisë.
Jeta e Weidel-it
Weidel u rrit në një familje katolike të shtresës së mesme në Harsewinkel, një qytet në Rhine-Westphalia Veriore, në perëndim të vendit, së bashku me dy motra/vëllezër dhe një qen të racës dachshund. Babai i saj ishte shitës, ndërsa nëna e saj ishte shtëpiake. Sipas “Die Welt“, gjyshi i saj ishte anëtar i Partisë Naziste dhe u emërua gjykatës ushtarak në Varshavën e pushtuar. Weidel u përgjigj se nuk e kishte njohur gjyshin e saj, i cili vdiq kur ajo ishte 6 vjeç, dhe se e kaluara naziste nuk ishte kurrë një temë diskutimi në familjen e saj. Gjatë përfundimit të doktoraturës për ekonomi në Bavari, ajo kaloi një periudhë në Kinë. Më vonë, ajo punoi si analiste në kompani si “Credit Suisse” dhe “Goldman Sachs”. Në intervista me mediat gjermane, ajo ka folur për dashurinë e saj për feng shui-n, një praktikë e lashtë kineze, si dhe për sportin e notit dhe tenisit gjatë fëmijërisë.
Alice Weidel dhe bashkëshortja e saj
Zyrtarisht, ajo e ndan kohën mes shtëpisë së saj në një qytet të vogël në qendër të Zvicrës dhe një shtëpie në distriktin e saj elektoral pranë liqenit Constance, në jug të Gjermanisë. Por Weidel ka pranuar se nuk kalon shumë kohë në adresën e saj në Gjermani. Ajo thotë se kjo është për arsye sigurie. Pavarësisht rritjes së mbështetjes për partinë e saj, ajo mbetet një figurë që shkakton polemika në një vend ku shumica e gjermanëve besojnë se AfD-ja duhet të izolohet. Mungesa e saj nga Gjermania është bërë një temë e ndjeshme për lideren e një partie nacionaliste. Ajo u largua nga një intervistë e transmetuar këtë javë nga një televizion publik, kur u pyet se sa net kishte kaluar në adresën e saj gjermane. Në të njëjtën intervistë, ajo pranoi se nuk e dinte sa njerëz jetonin në distriktin që përfaqëson në Parlament.
Meditim në Zvicër, ku Weidel jeton me familjen
Në nëntor, Weidel i tha një grupi biznesmenësh në Zyrih se situata e saj e sigurisë ishte përkeqësuar aq shumë, saqë i ishte bërë e vështirë të dilte spontanisht për të kërcyer ose për darkë me bashkëshorten e saj, Sarah Bossard, e cila është regjisore. “Jam jashtëzakonisht mirënjohëse ndaj bashkëshortes sime që e duron këtë,” tha ajo. Pavarësisht se është pyetur shumë herë, Weidel refuzon të shpjegojë se si e pajton kontradiktën e dukshme midis jetës së saj personale dhe vizionit të shoqërisë që përfaqëson partia e saj.
“Nuk jam queer,” tha ajo këtë verë në një intervistë, duke përdorur fjalën në anglisht, “por jam e martuar me një grua që e njoh prej 20 vitesh.” Sipas ekspertëve, fakti që jeta personale e Weidel-it bie ndesh me ideologjinë e partisë në fakt e forcon pozitën e saj si figurë kryesore e AfD-së dhe ndihmon në paraqitjen e partisë si më të pranueshme për publikun e gjerë. “Weidel është bërë fytyra e partisë falë biografisë dhe prejardhjes së saj, por edhe për shkak të aftësisë për të folur qartë edhe pse shpesh pa shumë empati.” tha Werner Patzelt, një politolog që ka studiuar AfD-në prej kohësh.
Ky shkrim është pronësi intelektuale e “The New York Times”. Lexoni KËTU shkrimin e plotë.
