Javën e kaluar kur firma ligjore Paul, Weiss, Rifkind, Wharton & Garrison arriti një marrëveshje me Trump-in për t’u shkëputur nga një urdhër ekzekutiv që mund të kishte shkatërruar biznesin e saj, kjo firmë e fuqishme e paraqiti këtë thjesht ripohim të parimeve të saj. Një nga këto parime është: “Ne refuzojmë të zmbrapsemi nga papëlqyeshmëria e një klienti ose e kauzës së tij.”
Por të enjten në mëngjes, vetëm disa orë para se Trump të shpallte në rrjetet sociale se kjo firmë, e njohur si Paul Weiss, kishte premtuar 40 milionë dollarë shërbime për iniciativa të përshtatshme me administratën e tij, firma prishi marrëdhëniet me organizatën më të vjetër dhe më të madhe të të drejtave civile të Latinëve në SHBA, Lidhja e Shtetasve të Bashkuar Latinë Amerikanë (LULAC).
“Marrëdhënia afatgjatë e “LULAC” me Paul Weiss ka qenë e frytshme,” tha CEO i organizatës, Juan Proaño, kur u kontaktua për këtë çështje. Paul Weiss, i cili tradicionalisht ka qenë i lidhur me demokratët kishte vendosur të mos përfaqësonte më këtë grup. Ky vendim është një aspekt i pa raportuar më parë i lëshimeve që firma i bëri Trumpit. Firma nuk pranoi të komentonte mbi këtë çështje.
“Supozimi im është se ata e shohin LULAC si një organizatë të DEI (Diversitet, Barazi dhe Përfshirje), thjesht sepse jemi latinë,” tha Proaño, duke iu referuar angazhimeve për diversitet, të cilat Trump-i i ka përçmuar publikisht. Ai shtoi: “Ne e kuptojmë presionin që po ushtrohet.”
Ky presion buron nga frika, frika nga veprimet e administratës, frika nga ndëshkimi për lidhje me grupe që presidenti i sheh si armiqësore dhe frika nga një qeveri e vendosur për hakmarrje.
Dy muaj pas fillimit të mandatit të dytë të Trumpit, frika po përhapet në shumë sektorë të shoqërisë amerikane. Ekzekutivët e biznesit spekulojnë privatisht se presidenti mund të jetë një aset i huaj, madje një “dhuratë për Kinën”, por publikisht nuk guxojnë të flasin. Administratorët e universiteteve dhe lobistët e tyre shprehin në heshtje lehtësim që Universiteti Columbia është bërë “shënjestra” e qeverisë, duke shpresuar që të mos bien vetë pre e sulmeve. Shkencëtarët, të shqetësuar se kërkimet e tyre do të anulohen, po fshijnë çdo referencë ndaj përpjekjeve për diversitet në punën e tyre.
Një atmosferë hakmarrjeje
Frika e tyre bazohet te veprimet agresive të Trumpit për të ndëshkuar kundërshtarët e tij të perceptuar. Këto veprime shkojnë përtej sulmeve në rrjetet sociale dhe presionit ndaj grupeve të cenueshme, si emigrantët dhe komuniteti transgjinor, që ishin karakteristikë e mandatit të tij të parë. Kësaj here, ai po përdor edhe mjetet e qeverisë, si:
Ndërprerja e financimeve federale, të cilat janë jetike për kërkimet shkencore dhe mjekësore.
Revokimi i çertifikatave të sigurisë, duke u mohuar avokatëve dhe studiuesve qasjen në ndërtesat federale.
Pasojat janë të rënda: ngrirje punësimesh, humbje klientësh dhe ndalje të studimeve klinike. Frika e përballjes me presidentin po shton heshtjen edhe te ata që normalisht do të ishin të gatshëm të flisnin.
Ekspertët e të drejtës së fjalës thonë se kjo shtypje nuk është parë që nga epoka e McCarthy-t, kur histeria antikomuniste solli listat e zeza, seancat e Kongresit dhe ndjekjet penale të ashpra ndaj akademikëve, artistëve dhe aktivistëve të krahut të majtë. “Jetoj në një epokë frike,” shkruante eseisti E.B. White në vitin 1947.
Sot, një fushatë e ngjashme kërcënimesh dhe frikësimi po drejtohet ndaj universiteteve, firmave ligjore dhe punonjësve federalë. Ekspertët thonë se frika që po përhapet te këto institucione është një tipar kryesor i regjimeve autoritare.
“Është një taktikë e zakonshme e regjimeve autoritare të detyrojnë individët dhe institucionet të shkelin parimet e tyre nga frika, duke i bërë ata më të dobët me kalimin e kohës,” thotë Lee Bollinger, ish-president i Universitetit Columbia.
Përulja e firmave ligjore dhe universiteteve
Dy ngjarje të javës së kaluar treguan thellësinë e frikës te firmat ligjore dhe universitetet e mëdha:
Firma Paul Weiss u përul përballë Trumpit, në mënyrë që ai të tërhiqte një urdhër ekzekutiv që u hiqte avokatëve të saj çertifikatat e sigurisë dhe qasjen në ndërtesat qeveritare.
Universiteti Columbia pranoi kërkesat e administratës të Trumpit për ndalimin e mbulimit të fytyrës, rritjen e sigurisë në kampus dhe ndryshimin e programit të Studimeve të Lindjes së Mesme, për të ruajtur një financim federal prej 400 milionë dollarësh.
Këto lëshime shkaktuan tronditje në komunitetin ligjor dhe akademik, duke bërë që të tjerët të ndihen edhe më pak të lirë për të sfiduar administratën. “Strategjia e pajtimit me Trumpin nuk funksionon asnjëherë,” thotë Bollinger. “Zgjidhja më e mirë është një rezistencë e fortë kolektive, veçanërisht përmes sistemit gjyqësor.”
Frika dhe heshtja e shoqërisë amerikane
Edhe pse ka disa akte të vogla kundërshtimi, shumica e institucioneve të mëdha amerikane po qëndrojnë të heshtura.
Presidenti i Universitetit Princeton, Christopher Eisgruber, paralajmëroi se fushata e Trumpit kundër Universitetit Columbia rrezikon të gjithë arsimin e lartë dhe vetë të ardhmen e vendit.
Megjithatë, shumica e drejtuesve akademikë po “ulin kokën” për të shmangur përplasjet. “Shumë presidentë universitetesh po mendojnë: ‘Le të presim dhe të shohim se si do të shkojë kjo situatë, le të zgjedhim betejat tona. Nuk është ende koha për të dalë hapur,” tha Ted Mitchell, presidenti i Këshillit Amerikan për Arsimin.
Reagimi nga komuniteti mjekësor ka qenë gjithashtu i vakët. Shoqata Mjekësore Amerikane (AMA) ka paralajmëruar për pasojat e rënda të shkurtimit të fondeve për kërkimet shkencore, por nuk ka ndërmarrë asnjë veprim kundër administratës.
Në fund, një pyetje e frikshme që po shtrojnë shumë firma ligjore dhe institucione është:
“Ku ndodhemi ne në listën e shënjestrave të Trumpit.”
Shënim- Ky artikull është pronësi intelektuale e “The Atlantic”. Lexo KËTU. “The Atlantic” është një media që ka mbështetur demokratët, si dhe Joe Biden në zgjedhjet presidenciale të vitit 2020. Njihet si një media që shpesh kritikon Trumpin dhe politikat e tij.
