Lufta ajrore mes Shteteve të Bashkuara të Amerikës, Izraelit dhe Iranit është zgjeruar ndjeshëm, duke përfshirë edhe Libanin, ndërsa tensionet janë përhapur në të gjithë rajonin e Gjirit. Sipas “Reuters”, përplasjet kanë hyrë në një fazë të re dhe me pasoja të gjera ushtarake e ekonomike. Një front i ri u hap pasi lëvizja e Hezbollahut lëshoi raketa dhe dronë drejt Izraelit, në shenjë hakmarrjeje për vrasjen e liderit suprem iranian, Ajatollah Ali Khamenei. Në përgjigje, Izraeli ndërmori sulme ajrore në periferitë jugore të Bejrutit, zona të kontrolluara nga Hezbollahu. Sipas agjencisë shtetërore libaneze “NNA”, nga sulmet u raportuan të paktën 31 të vrarë dhe 149 të plagosur. Autoritetet izraelite deklaruan se lideri i Hezbollahut, Naim Qassem, është shpallur “objektiv për eliminim”, por për momentin nuk po shqyrtohet një ndërhyrje tokësore në Liban.
Konflikti mori një kthesë dramatike kur mbrojtja ajrore e Kuvajt rrëzoi gabimisht tre avionë luftarakë amerikanë F-16 gjatë një sulmi iranian. Sipas ushtrisë amerikane, të gjashtë anëtarët e ekuipazhit u shpëtuan me sukses. Pamje të verifikuara nga “Reuters” tregojnë një prej avionëve duke u rrëzuar në flakë para se të shpërthente në tokë. Irani deklaroi se kishte shënjestruar baza ushtarake amerikane në Kuvajt, si dhe “anije armike” në Gjirin Persik.
Shpërthime u raportuan edhe në Dubai, Doha dhe zona të tjera të Gjirit. Një dron goditi edhe bazën ajrore britanike në Akrotiri, në Qipro, duke shënuar sulmin e parë që prek aleatët evropianë të SHBA-së. Autoritetet britanike dhe qipriote thanë se dëmet ishin të kufizuara dhe nuk pati viktima. Ndërkohë, Arabia Saudite mbylli rafinerinë e saj më të madhe pas një sulmi me dron që shkaktoi zjarr, ndërsa disa instalacione nafte në rajon u vunë në shënjestër.
Presidenti amerikan Donald Trump e cilësoi fushatën ushtarake si një hap të domosdoshëm dhe paralajmëroi se operacioni, i koduar “Operation Epic Fury”, mund të zgjasë me javë. Ai u bëri thirrje iranianëve të ngrihen kundër udhëheqjes së tyre dhe premtoi imunitet për forcat që dorëzohen. Megjithatë, brenda Iranit situata mbetet e paqartë. Sipas “Reuters”, shumë qytetarë kanë braktisur qytetet nga frika e bombardimeve, ndërsa reagimet variojnë nga pasiguria te festimet për vdekjen e Khameneit, i cili kishte drejtuar vendin për 37 vjet.
Përshkallëzimi i konfliktit ka tronditur gjithashtu edhe tregjet ndërkombëtare. Çmimet e energjisë u rritën ndjeshëm në hapjen e tregjeve, ndërsa transporti detar përmes Ngushticës së Hormuzit ku kalon rreth një e pesta e tregtisë botërore të naftës është ndërprerë pjesërisht. Qindra anije, përfshirë cisterna nafte dhe gazi, kanë ndaluar në ujërat përreth. Sipas një sondazhi “Reuters/Ipsos”, vetëm një në katër amerikanë mbështet operacionin ushtarak, duke e kthyer konfliktin në një rrezik politik për administratën Trump përpara zgjedhjeve të ndërmjetme. Ndërsa luftimet vazhdojnë dhe aleatët perëndimorë mbajnë një qëndrim të rezervuar, perspektiva për një zgjidhje diplomatike mbetet e paqartë. Një zyrtar i lartë i Shtëpisë së Bardhë tha për “Reuters” se në një moment do të ketë bisedime me Teheranin, por “jo tani”, pasi operacionet
