Klaudia Muça është një vajzë 21-vjeçare nga Cërriku, e cila ka thyer të gjitha pritshmëritë e njerëzve rreth saj, duke bërë atë që në Shqipëri më shumë shikon djemtë të bëjnë: arbitren e futbollit.
Futbolli ka qenë pasioni i Klaudias dhe një ëndërr e saj qëkur ishte e vogël dhe pikërisht për të qenë afër sportit, ajo zgjodhi të studionte gazetari, për të bërë komentatoren sportive. Por frymëzimi i erdhi diku tjetër, një dritare e re iu hap dhe përveç studimeve ajo nisi të bënte dhe arbitren.
“Pasioni im për sportin ka nisur që në fëmijëri ku vazhdoja të luaja me shkollën, kryesisht në futboll. Një shtysë e madhe ka ardhur nga profesori i edukimit fizik, Mikel Cena. Mikeli më dha një mendim që të bëhem gjyqtare sporti dhe kjo ishte shtysa ime më e madhe që ta nis këtë rrugëtim, i cili besoj do jetë mjaft i gjatë.”- tregoi Klaudia kur e pyetëm se si nisi ky rrugëtim i saj.
Ajo tregoi se synimet i ka edhe më lart se kaq dhe çfarë ajo ëndërron tani është të ketë edhe stemën e FIFA-s.
Po ashtu arbitrja e re, e cila njëkohësisht studion gazetari, ka edhe një mesazh për të gjithë bashkëmoshatarët e saj, që të mos largohen nga vendi i tyre.
“Europën e gjeni këtu, në Shqipëri.”- shprehet ajo.
