Gazetarja Klodiana Lala ka investiguar si pastrohen paratë në projektet e ndërtimit në Tiranë. Në një shkrim të publikuar te Reporteri.al, Lala tregon si bosi i narkotrafikut, Franc Çopja investonte në hije projektet e ndërtimit në Tiranë, ndërsa i drejtonte operacionet e tij të pastrimit të parave nga Dubai. Ai dyshohet se dirigjoi nga Dubai një ushtri me njerëz për të pastruar paratë e tij në Shqipëri si dhe negocioi një sërë marrëveshjesh biznesi.
Në shkrim përmendet një rast kur Dorjan Dyli me profesion farmacist ka marrë pranë një pike të këmbimit valutor shumën prej 121 mijë eurosh, që i ka përdorur si këst të parë për blerjen e një apartamenti në një godinë përballë Fakultetit Ekonomik, i cili identifikohet si “pallati me fasadë të kuqe” në dosje. Ai i ka tërhequr paratë duke u identifikuar me emrin e koduar “shoku i Valkanit”. Apartamenti kushtonte në total 236 mijë euro, por pjesën tjetër Dyli e ka mbuluar me një kredi fiktive të marrë në bankë, të cilën e ka shlyer me paratë e dërguara nga Çopja dhe që qëndronin në pikën e këmbimit valutor të Micit.
Në njërën nga bisedat e zhvilluara në SKY ECC që ndodhet në vendimin e gjykatës, Dyli i shpjegoi Çopjes se “drejtori i bankës e kishte këshilluar që kalimi i pagesave të bëhej çdo 5-6 ditë me shuma monetare 7 mijë deri në 10 mijë euro, pasi kur bëhen derdhjet cash nuk gjurmohen dot, vetëm se kanë komisione të larta”.
Për më shumë lexo artikullin e plotë te Reporteri.al
