Presidenti i zgjedhur Donald Trump tha se do të nënshkruajë një sërë urdhrash ekzekutivë të hënën dhe premtoi të nisë “rikthimin e plotë të Amerikës dhe revolucionin e arsyes së shëndoshë,” sipas pjesëve të shkëputura nga fjalimi i tij i inaugurimit.
EKONOMIA/INFLACIONI
“Do të udhëzoj të gjithë anëtarët e kabinetit tim që të përdorin fuqitë e mëdha në dispozicionin e tyre për të luftuar inflacionin rekord dhe për të ulur shpejt kostot dhe çmimet. Kriza e inflacionit u shkaktua nga shpenzimet masive dhe rritja e çmimeve të energjisë, dhe për këtë arsye sot do të shpall gjithashtu një emergjencë kombëtare energjetike. Do të gërmojmë, sa më shumë të jetë e mundur.Amerika do të bëhet përsëri një komb prodhues dhe ne kemi diçka që asnjë komb tjetër prodhues nuk do ta ketë kurrë: sasinë më të madhe të naftës dhe gazit nga çdo vend tjetër në botë, dhe ne do ta përdorim atë.”Do të ulim çmimet, do të mbushim rezervat tona strategjike deri në kapacitet të plotë dhe do të eksportojmë energji amerikane në mbarë botën. Do të jemi sërish një komb i pasur, dhe është ajo ar që ndodhet nën këmbët tona që do të ndihmojë ta bëjmë këtë.”
POLITIKA MJEDISORE
“Me veprimet e mia sot do të përfundojmë Marrëveshjen e Re të Gjelbër dhe do të revokojmë mandatin për automjetet elektrike, duke shpëtuar industrinë tonë të automobilave dhe duke mbajtur premtimin tim të shenjtë për punëtorët tanë të mëdhenj amerikanë të industrisë së automobilave.”
IMIGRACIONI
“Çdo hyrje ilegale do të ndalet menjëherë dhe ne do të fillojmë procesin e kthimit të miliona, miliona dhe miliona kriminelëve të huaj në vendet nga ku kanë ardhur.Do të rivendos politikën time ‘Qëndro në Meksikë’. Do t’i jap fund praktikës së kapjes dhe lirimit dhe do të dërgoj trupa në kufirin jugor për të ndaluar pushtimin katastrofik të vendit tonë. Nën urdhrat që firmosa sot, do të shpallim kartelet si organizata terroriste të huaja. Dhe duke përdorur Aktin për Armiqtë e Huaj të vitit 1798, do të udhëzoj qeverinë tonë të përdorë fuqinë e plotë dhe të madhe të ligjit federal dhe shtetëror për të eliminuar praninë e të gjitha bandave të huaja dhe rrjeteve kriminale që sjellin krime shkatërruese në tokën amerikane, duke përfshirë qytetet tona dhe zonat urbane.”Si komandant i përgjithshëm, nuk kam përgjegjësi më të lartë sesa të mbroj vendin tonë nga kërcënimet dhe pushtimet dhe pikërisht këtë do të bëj.“
LUFTËRAT NDËRKOMBËTARE DHE PLANET PËR PAQEN
“Do të jemi një komb si asnjë tjetër, plot dhembshuri, kurajë. Fuqia jonë do të ndalojë të gjitha luftërat dhe do të sjellë një frymë të re uniteti në një botë që ka qenë e zemëruar, e dhunshme dhe krejtësisht e paparashikueshme. Amerika do të respektohet dhe admirohet sërish.”
TRASHËGIMIA E PAQES DHE UNITETIT
“Trashëgimia ime më e çmuar do të jetë ajo e një pajtuesi dhe unifikuesi. Kjo është ajo që dua të jem: një pajtues dhe unifikues. Më vjen mirë të them se që nga dje, një ditë para se të merrja detyrën, pengjet në Lindjen e Mesme po kthehen në shtëpi, pranë familjeve të tyre. Ne do të ndërtojmë sërish ushtrinë më të fortë që bota ka parë ndonjëherë. Do të matim suksesin tonë jo vetëm me betejat që fitojmë, por edhe me luftërat që përfundojmë dhe, ndoshta më e rëndësishmja, me luftërat që nuk i nisim kurrë.Ne kemi një qeveri që ka dhënë fonde të pakufizuara për të mbrojtur kufijtë e vendeve të huaja, por refuzon të mbrojë kufijtë amerikanë dhe, më e rëndësishmja, popullin e saj.”
PANAMA
“Premtimi i Panamasë ndaj nesh është thyer. Qëllimi i marrëveshjes sonë dhe fryma e traktatit janë shkelur plotësisht. Anijet amerikane po tarifohen në mënyrë të padrejtë dhe nuk po trajtohen me ndershmëri në asnjë formë, përfshirë Marinën e Shteteve të Bashkuara. Dhe, mbi të gjitha, Kina po operon Kanalin e Panamasë, ndërkohë që ne nuk ia dhamë Kinës, ia dhamë Panamasë. Dhe tani do ta marrim sërish.”
RACA DHE GJINIA
“Këtë javë do të përfundoj gjithashtu politikën e qeverisë për të inxhinieruar socialisht racën dhe gjininë në çdo aspekt të jetës publike dhe private. Do të krijojmë një shoqëri që nuk sheh ngjyrë dhe që bazohet në meritë. Që sot e tutje, politika zyrtare e qeverisë së Shteteve të Bashkuara do të jetë që ekzistojnë vetëm dy gjini: mashkull dhe femër.”
EKSPLORIMI HAPËSINOR
“Shtetet e Bashkuara do ta konsiderojnë veten sërish një komb në rritje, që rrit pasurinë, zgjeron territorin, ndërton qytetet, rrit pritshmëritë dhe ndjek plane drejt horizonteve të reja dhe të bukura. Ne do të ndjekim fatin tonë drejt yjeve, duke nisur astronautët amerikanë për të vendosur Flamurin me Yje në planetin Mars.”
TENTATIVA PËR ATENTAT
“Udhëtimi për të rimarrë republikën tonë nuk ka qenë i lehtë, këtë mund t’jua them. Ata që dëshirojnë të ndalin kauzën tonë kanë tentuar të më marrin lirinë dhe, në fakt, jetën time. Vetëm disa muaj më parë, në një fushë të bukur në Pensilvani, një plumb atentatori përshkoi veshin tim, por atëherë ndjeva dhe tani besoj më shumë se kurrë se jeta ime u shpëtua për një arsye. Zoti më shpëtoi për ta bërë Amerikën sërish të madhe.”
NDRYSHIMET E EMRAVE
“Amerika do të rimarrë vendin e saj të drejtë si kombi më i madh, më i fuqishëm dhe më i respektuar në Tokë, duke frymëzuar mahnitjen dhe admirimin e mbarë botës. Pas pak kohe, ne do të ndryshojmë emrin e Gjirit të Meksikës në Gjiri i Amerikës dhe do të rikthejmë emrin e një presidenti të madh, William McKinley, për Malin McKinley, ku duhet të jetë dhe ku i takon.”
UNITETI
“Ne jemi një popull, një familje dhe një komb i lavdishëm nën Zotin. Kështu që për çdo prind që ëndërron për fëmijën e tij dhe çdo fëmijë që ëndërron për të ardhmen e tij, unë jam me ju. Do të luftoj për ju dhe do të fitoj për ju. Do të fitojmë si kurrë më parë.”
Ky shkrim është pronësi intelektuale e “Reuters”. Lexo Këtu artikullin origjinal
