Avokate me profesion, 50-vjeçarja Fatima Zahra El Mansouri ka qenë për disa vite kryetare e bashkisë së Marrakeshit.
Fatima Zahra El Mansouri është emëruar kryeministrja e parë grua e Marokut, pasi partia e saj , Partia e Autenticitetit dhe Modernitetit (PAM), fitoi numrin më të madh të vendeve në zgjedhjet parlamentare të javës së kaluar.
Emërimi i saj e bën atë gruan e dytë që drejton një qeveri në botën arabe, pas kryeministres së Tunizisë, Najla Bouden.
Ajo u emërua nga Mbreti Mohammed VI, i cili e zgjodhi atë si kryeministre në vend të kreut të futbollit në vend, Fouzi Lekjaa, një politikan i rëndësishëm i së njëjtës parti. El Mansouri, 50 vjeç, ka qenë për disa vite kryetare e bashkisë së Marrakeshit dhe gjithashtu ka shërbyer si ministre në qeverinë e mëparshme të koalicionit.
Maroku është një monarki kushtetuese, por pjesa më e madhe e pushtetit mbetet në duart e mbretit.
Si Ceuta, futbolli dhe Izraeli ndikuan në zgjedhjet e Marokut
Në një konferencë për shtyp pas fitores, përpara se të shpallej kryeministre, El Mansouri u pyet nëse shteti do të duhej të bënte ndryshime për ta përshtatur rolin e saj me ceremonitë fetare myslimane ku merr pjesë mbreti, përfshirë namazet e së premtes dhe të Bajramit, ku burrat dhe gratë falen në seksione të ndara.
Ajo nuk iu përgjigj drejtpërdrejt pyetjes, por në vend të kësaj vlerësoi mbretin, duke e cilësuar atë si “mbështetësin më të madh të grave” në vend.
“Madhëria e Tij është bartësi i urtësisë… Nëse më besohet përgjegjësia për të drejtuar qeverinë, do të jetë një nder i madh”, tha ajo.
El Mansouri është një nga gratë politikane më të njohura të Marokut. E diplomuar për drejtësi, ajo studioi në Universitetin Mohammed V në kryeqytetin Rabat, përpara se të vazhdonte arsimin në Francë dhe SHBA, ku u specializua në të drejtën e biznesit dhe të drejtën e korporatave. Ajo hyri në politikë pas themelimit të PAM-it në vitin 2008 dhe në vitin 2009 u bë gruaja e parë që shërbeu si kryetare e bashkisë së Marrakeshit. Ajo u rikthye në këtë post pas zgjedhjeve të vitit 2021.
Gjatë pesë viteve të fundit, ajo shërbeu si ministre për planifikimin territorial, urbanistikën, strehimin dhe politikën e qyteteve, nën ish-kryeministrin Aziz Akhannouch. Në shkurt 2024, ajo u bë koordinatore e koalicionit drejtues të PAM-it.
El Mansouri ka kundërshtuar portretizimin e saj si një “grua e hekurt”, duke thënë për revistën e PAM-it në vitin 2021:
“Unë nuk jam as grua prej çeliku dhe as prej hekuri… Jam një aktiviste e lirë.”
Ky shkrim është pronësi intelektuale e BBC
