Kryeministrja italiane Giorgia Meloni pritet të takohet me Presidentin amerikan Donald Trump në Uashington të enjten. Agjencitë e lajmeve bien dakord se vizita do të fokusohet veçanërisht në mosmarrëveshjen për tarifat midis Shteteve të Bashkuara dhe Bashkimit Evropian.
Tensionet janë zbutur disi që kur u njoftua vizita. BE-ja pezulloi tarifat hakmarrëse mbi çelikun dhe aluminin pasi Trump shpalli një pezullim 90-ditor të tarifave 20% ndaj BE-së. Presidentja e Komisionit Evropian Ursula von der Leyen tha se ky pezullim u jep negociatave me SHBA-në një tjetër shans.
Megjithëse tani ka një lehtësim të tensioneve, Teresa Coratella, zëvendësdrejtoreshë e zyrës së Këshillit Evropian për Marrëdhëniet me Jashtë (ECFR) në Romë, parashikon se qëllimi kryesor i Melonit mbetet negociimi për tarifat.
Coratella, si dhe Leo Goretti, drejtues i programit të politikës së jashtme italiane në Institutin Italian për Çështje Ndërkombëtare (IAI), presin që Meloni të përpiqet të shfrytëzojë marrëdhënien e saj të mirë me Trump për të gjetur një zgjidhje për konfliktin e tarifave BE–SHBA.
Meloni ishte e vetmja kryetare qeverie evropiane që mori pjesë në inaugurimin e Trump në janar. Po në atë muaj, gjatë një vizite në resortin Mar-a-Lago të Trump, ai e quajti atë një “grua fantastike”. Kohët e fundit, burime italiane kanë theksuar shpesh se qeveria italiane dëshiron të veprojë si një “urë” midis SHBA-së dhe BE-së.
Cili është qëndrimi i Melonit?
Para udhëtimit të saj, Meloni u tha drejtuesve të biznesit se ajo mbështet një propozim të Komisionit Evropian për tarifa zero mes SHBA-së dhe BE-së. Agjencia e lajmeve “Reuters”, duke cituar një draft të fjalimit të saj, tha se ajo do t’i përmbahet kësaj pozite gjatë vizitës në Uashington.
Von der Leyen gjithashtu ka mbështetur shpesh një marrëveshje me tarifa zero nga të dyja palët, më së fundmi në një postim në rrjetin “X” javën e kaluar.
Megjithatë, Goretti e quan qasjen e Melonit ndaj SHBA-së një “lojë me rrezik”. “Sado afër ideologjikisht të jetë [Meloni] me Trump, ajo nuk mund të rreshtohet me SHBA-në kundër Brukselit,” tha ai.
Meloni, e cila drejton partinë e djathtë Fratelli d’Italia (Vëllezërit e Italisë), është nën presion nga interesat ekonomike të brendshme. Në vitin 2024, Italia kishte një suficit prej gati 40 miliardë eurosh në tregtinë e mallrave me Shtetet e Bashkuara i treti më i madh në BE pas Gjermanisë dhe Irlandës. Rreth 10% e të gjitha eksporteve italiane shkojnë në SHBA. Por tregu amerikan mbetet shumë më pak i rëndësishëm për ekonominë italiane sesa tregu i përbashkët i BE-së, theksoi Goretti.
A do të flasë Meloni në emër të BE-së?
Brukseli ka theksuar vazhdimisht se negociatat për tarifat janë, në thelb, përgjegjësi e Komisionit Evropian. Zëdhënësja e Komisionit Evropian, Arianna Podesta, tha se, për shkak të kësaj vizite, ka pasur kontakte së fundmi midis presidentes së Komisionit, von der Leyen, dhe kryeministres italiane Meloni. Janë planifikuar komunikime të tjera para nisjes së Melonit, dhe Podesta e përshkroi angazhimin e saj si “shumë të mirëpritur dhe të koordinuar ngushtë”.
Komisioneri i Tregtisë i BE-së, Maros Sefcovic, gjithashtu vizitoi këtë javë Uashingtonin. Pas takimeve, ai theksoi se BE-ja është e gatshme të punojë për një “marrëveshje të drejtë”, duke përfshirë ofertën për tarifa zero mbi mallrat industriale. Ai theksoi në një postim në “X” se një marrëveshje e tillë do të kërkonte një “përpjekje të përbashkët domethënëse nga të dyja palët”.
Shënim: Ky shkrim është pronësi intelektuale e “Deutsche Welle”-s. Lexo KËTU.
