Hotel “Regina Palma” në Orikum u sulmua sot me armë, ndërsa pronari u godit me qytën e një arme në kokë. Konflikti lidhet me shantazhe të mëparshme ndaj pronarit Vasil Bedinaj, i cili pretendon se i kanë kërkuar 5 milionë euro, në të kundërt do t’i kanoseshin rreziqe të tjera.
Ngjarja ka ndodhur rreth orës 10:30, kur mbi 20 persona bashkë me pronarin e “Delta Group” Luan Muçaj, zbarkuan me 8 automjete të ndryshme pranë hotelit në Orikum, duke debatuar fillimisht me Vasil Bedinajn, ndërsa ngjarja përshkallëzoi deri në përdorimin e armëve.
Pas konfliktit të rëndë në hotelin e frekuentuar ende nga turistët, autorët janë larguar me shpejtësi nga vendngjarja. Me marrjen e njoftimit për sulmin, shërbimet e policisë janë vënë në lëvizje, duke ndjekur pas njërin prej automjeteve. Përpjekja për arratisje e tre personave dështoi, pasi shoferi humbi kontrollin dhe mjeti u përmbys në rrugë. Për pasojë, të dy personat që ndodheshin brenda u plagosën, ndër ta biznesmeni Muçaj dhe më pas u dërguan në spital për të marrë ndihmë mjekësore. Personit tjetër nuk pësoi lëndime. Policia ushtroi kontrolle në mjetin e tyre, ku u gjet një pistoletë, e cila do të dërgohet për ekspertim, për të parë nëse është kryer qitje përmes saj.
Deri në këto momente, blutë e Vlorës kanë shoqëruar 10 persona, 3 prej të cilëve u lanë në qeli. Ndërkohë, forca të shumta policie kanë ngritur postblloqe në çdo hyrje-dalje të Vlorës, për të bërë të mundur kapjen e personave të tjerë të përfshirë në këtë konflikt të armatosur.
Njoftimi DVP Vlorë
Vlorë/Informacion paraprak
Rreth orës 11:30, pronari i një resorti në Vlorë ka njoftuar Policinë se persona të armatosur po konfliktoheshin me të.
Menjëherë pas njoftimit, shërbimet e Policisë kanë shkuar në drejtim të adresës së dhënë, si dhe kanë ngritur pika kontrolli.
Shërbimet e Policisë, në afërsi të Pusit të Mezinit, kanë konstatuar një automjet që lëvizte me shpejtësi dhe janë vënë në ndjekje të tij.
Drejtuesi i këtij automjeti ka humbur kontrollin dhe është aksidentuar. Në automjet janë konstatuar 3 shtetas, 2 prej të cilëve janë dëmtuar si pasojë e aksidentit, ndërsa tjetri nuk ka probleme shëndetësore.
Gjatë kontrollit në automjet, shërbimet e Policisë kanë gjetur 1 armë zjarri, pistoletë.
Është ngritur një grup i posaçëm hetimor, i cili, në drejtimin e Prokurorisë, po punon për zbardhjen e dinamikës së ngjarjes dhe identifikimin e të gjithë shtetasve të përfshirë.
Shërbimet e Policisë së DVP Vlorë, në bashkëpunim me shërbimet e disa DVP-ve të tjera, po kryejnë kontrolle dhe veprime të tjera, me qëllim identifikimin dhe kapjen e shtetasve të tjerë të përfshirë në këtë ngjarje.
Me qenë se veprimet janë dinamike, në përfundim të veprimeve të para hetimore do të ketë një njoftim të plotë për ngjarjen.
