Një efektiv i Forcave të Armatosura u plagos gjatë operacionit për shuarjen e zjarrit që ka përfshirë prej disa ditësh Mirditën. Burime për Gogo.al bëjnë me dije, se efektivi 28-vjeçar është plagosur gjatë kohës kur po furnizohej me ujë në autobotin zjarrshues, ku nga presioni i lartë i ujit tubi shpërtheu dhe një pjesë metalike e tij e goditi, duke e lënë të plagosur. Efektivi i plagosur u transportua me helikopter drejt Spitalit Universitar të Traumës në Tiranë, ku po merr aktualisht trajtimin e nevojshëm nga mjekët neurokirug, bën të ditur Ministria e Mbrojtjes.
Ende nuk dihet nëse kanë nisur hetimet për zbardhjen e rrethanave të kësaj ngjarjeje, me pasojë plagosjen e efektivit të Forcave të Armatosura, ndërsa pritet të bëhet e ditur nëse autoboti zjarrfikës ka pasur defekt në tubin lidhës.
Mirdita mbetet ndër zonat më të prekura nga zjarret ditët e fundit, ku vijojnë të jenë aktive dy vatra në Shtanë-Tenë dhe në Shtuf, me një sipërfaqe të shkrumbuar që përllogaritet në rreth 15 hektarë. Lidhur me këto zjarre, Policia e Lezhës ka vënë në pranga një 62-vjeçar, i cili dyshohet se ndezi qëllimisht disa vatra zjarri në pjesë të ndryshme të pyllit.
