Anija “Cassiopea” do të sjellë në Shëngjin për t’u nisur në kampin e Gjadërit 49 emigrantë. Pas një pushimi dymujor, operacionet për dërgimin e emigrantëve të shpëtuar në Mesdhe në qendrat në Shqipëri do të rifillojnë, thanë të premten burime të mirëinformuara për “Ansa”-n. Mediet italiane raportojnë mbi numrin 49 të emigrantëve, të cilët janë nga Bangladeshi dhe Egjipti dhe janë nisur nga ishulli i Lampedusës.
Gjyqtarët italianë refuzuan dy grupet e para të azilkërkuesve të sjellë në Shqipëri, duke i çuar çështjet e tyre në Gjykatën Evropiane të Drejtësisë, e cila më parë kishte vendosur që një aplikant nuk mund të kalonte një procedurë të shpejtë, gjë që mund të çojë në riatdhesimin e tyre nëse vendi i origjinës nuk do të konsiderohej plotësisht i sigurt.
Vendet e origjinës në rastet e Bangladeshit dhe Egjiptit, nuk u gjykuan si të sigurta “në të gjithë territorin e tyre”. Qeveria italiane në dhjetor u përpoq të kapërcejë këtë pengesë me një masë që rendit 19 vende të sigurta për riatdhesim, duke përfshirë Bangladeshin dhe Egjiptin.
