Një gjykatës federal në Shtetet e Bashkuara ka urdhëruar rikthimin e plotë të funksionimit të Zërit të Anerikës (VOA), duke detyruar administratën e Donald Trump të anulojë vendimet që çuan në shpërbërjen praktike të këtij institucioni mediatik. Sipas raportimeve të “The Guardian”, vendimi i gjykatësit Royce Lamberth e konsideron të paligjshme mbylljen e operacioneve të Zërit të Amerikës dhe ndërhyrjet në US Agency for Global Media (USAGM), agjencia që e mbikëqyr atë. Ky vendim përbën një kthesë të rëndësishme në përplasjen ligjore mes administratës dhe medias publike ndërkombëtare, duke rikthyer në punë mbi 1,000 gazetarë dhe punonjës dhe duke i hapur rrugë rinisjes së transmetimeve për një audiencë globale që prej një viti kishte mbetur pa këtë burim informacioni. Në vendimin e tij, gjykatësi Lamberth urdhëroi që punonjësit e larguar të rikthehen në detyrë deri më 23 mars dhe i dha USAGM një afat njëjavor për të hartuar një plan konkret për rikthimin e VOA-s në transmetim. Ai kritikoi ashpër vendimmarrjen e administratës, duke theksuar se nuk ishte paraqitur asnjë bazë e arsyeshme ligjore për mbylljen e institucionit.
Çështja lidhet ngushtë me rolin e Kari Lake, e cila ishte vendosur në krye të USAGM, por për të cilën gjykata vendosi më herët se nuk kishte autoritet ligjor për veprimet e ndërmarra. Gjatë drejtimit të saj, ajo kishte reduktuar ndjeshëm aktivitetin e VOA-s dhe kishte larguar mbi 1,000 punonjës, duke e lënë institucionin me staf minimal funksional. Lake ka deklaruar se do ta ankimojë vendimin.
Nga ana tjetër, drejtues dhe gazetarë të VOA-s e kanë përshëndetur vendimin si një hap thelbësor për rikthimin e misionit të tyre. Ata kanë theksuar nevojën për të rindërtuar besimin e audiencës globale dhe për të rikthyer standardet e gazetarisë së pavarur, pas një periudhe njëvjeçare pezullimi.
E themeluar gjatë Luftës së Dytë Botërore, VOA mbetet një nga transmetuesit më të rëndësishëm ndërkombëtarë të SHBA-së, duke ofruar informacion në dhjetëra gjuhë dhe duke arritur qindra miliona njerëz në mbarë botën. Vendimi i fundit pritet të ketë ndikim të gjerë jo vetëm në funksionimin e këtij institucioni, por edhe në debatin mbi pavarësinë e mediave publike në Shtetet e Bashkuara.
